Aprobado na sa Ubos Balay Balauranan sa ikatulo ug katapusang pagbasa ang balaudnon nga nagdeklarar nga special non-working holiday sa Abril 27 lukop nasod matag tuig.
Ang petsa mao ang kasumaran sa Kadaugan sa Mactan nga kanunay isaulog sa Dakbayan sa Lapu-Lapu.
Si Kongresista Paz Radaza maoy niduso sa maong balaudnon sa Kongreso isip House Bill 8897.
Sumala sa kongresista naaprobar ang iyang balaodnon niadtong Marso 16, 2021.
Alang sa kongresista, ang maong balaudnon paagi nga matagaan og igong pahinungod ang bayaning si Datu Lapulapu ug sa ingon makahatag usab og kahigayonan sa katawhang Pilipino nga maka-obserbar ug makaselebrar niini matag tuig. Ang National Historical Commission ug kagamhanan sa Lapu-Lapu una nang nipadala og suwat sa Malacañang kalabot sa pagdeklarar nga special non-working holiday sa Abril 27, apan wala pay tubag sa pagkakaron.
“Daku akong pasalamat sa akong mga kauban sa Kongreso tungod kay, bisan pa man nga pareho kaming mga busy sa pag-atiman sa paghatag og solusyon sa mga problema hilabi niining pandemya, ila gihapon gisuportahan ang akong bill,” matod ni Radaza. (GCM)