Ang Cebu City mitala og labing ubos nga critical care utilization rate gikan sa 15 ka mga hospital sa dakbayan niadtong Abril 18, 2021.
Base sa talaan sa Emergency Operation Center(EOC), anaa nalang sa 25.4 porsento ang kinatibuk-ang occupancy rate nga maoy labing ubos gikan niadtong buwan sa Enero nga maoy sugod sa ikaduhang pagsaka sa kaso sa Covid sa Cebu City.
Ang 15 ka mga pasilidad adunay 932 bed capacity alang sa pasyente sa Covid apan 237 ra ang okupado ug bakante pa ang 695 beds.
Ang 11 ka private hospitals anaa nalang sa 16.4 porsento ang ilang occupancy rate nga maoy labing ubos human nidagsa ang mga kaso sa Covid-19 diin bakante ang 545 ka beds, samtang 107 ra ang nalandig sa tambalanan ug kasamtangang nagpaalim sa ilang balati-an.
“Mao ni ang pinakagamay nato labi na sa private hospitals ang atong quarantine facilities like NOAH, CCQC and BIC naara ta sa mga 30% occupancy amd this is a good indication because we are also concentrating our massive vaccination for our senior citizens,” pahibawo ni Cebu City Councilor Joel Garganera.
Sa kasamtangan, ang Cebu City aduna nalay 701 ka mga aktibong kaso diin mayoriya kanila anaa sa mga hotel ug quarantine facilities ug BIC’s.
Ang barangay Guadalupe nga maoy nag-una sa labing daghan og kaso sukad pagsugod sa Covid 19, karon nahimutang nalang sila sa ikaduhang dapit nga adunay 46 ka aktibong kaso samtang nag-una ang barangay Lahug nga adunay 47. (PAC)