Tulo ang kompirmadong patay, 10 pa ang missing ug pito ang survivors sa mga tripolante sa nasangad nga barkong cargo sa lungsod sa Malimono, lalawigan sa Surigao del Norte sa Lunes sa hapon, Abril 19, 2021.
Ang LCT Cebu Great Ocean gikuso-kuso sa dagkong mga bawod samtang naglawig sa kadagatan karga ang nickel ore ug 2,000 litros sa diel, matod sa taho sa RPN DXKS Surigao. Niadtong tungora, bawod ang kadagatan tungod sa bagyong Bising.
Ang nangamatay giilang sila si engineer Marvin Lusica, electrician Norman Galon ug oiler Lemuel Davidas samtang ang survivors giilang sila si Noli Labucay, chief mate Roger Polo, Arjie Bacarra, Jojie Villanueva, Felipe Quebuen Jr., John Renso Guanzon samtang ang usa wa mailhi kay wa pa makatingog.
Wa pa usab nganli ang 10 ka mga tripolante nga missing.
Lima sa survivors gi-admit sa Caraga Regional Hospital samtang ang duha sa Malimono District Hospital.
Nagpadayon ang search and rescue operation sa Philippine Coast Guard ug disaster response teams sa nahisgutang dapit.
Wa pa mahibaw-i kon diin gikan ug asa ang destinasyon sa barko kay wa pa motubag ang Coast Guard Station sa Sugbo dihang gi-contact sa Superbalita Cebu aron unta kuhaan og dugang mga impormasyon. (REV)