Andam moabag ang Dakbayan sa Sugbo sa pamilya ni Ritchie Nepomuceno, kinsa gipusil patay sa Lunes sa gabii, Abril 19, 2021.
Si Mayor Edgardo Labella, sa iyang press conference sa hapon sa Miyerkules, Abril 21, 2021, niingon nga iyang gimandoan si city legal officer manlalaban Rey Gealon sa paghatag og legal nga abag sa nahabiling pamilya ni Nepomuceno.
Giawhag ni Labella ang bana ni Nepomuceno sa pagduaw sa iyang buhatan o kang Gealon aron mahatagan og legal assistance.
“Paluyohan nato sa bisan unsang legal assistance aron makab-ot ang hustisya,” matod ni Labella atol sa press conference.
Gikondenar ni Labella ang pagpatay kang Nepomuceno.
Si Nepomuceno gipusil patay samtang naglakaw padung sa ilang balay sa Barangay Basak, Dakbayan sa Sugbo human siya gihatod sa mga pulis gikan sa Vicente Sotto Memorial Medical Center (VSMMC).
Siya gikan gipahiling sa Pink Room nunot sa kasong rape nga gipasaka batok kang Police Staff Sergeant Celso Colita.
Ni-escort kaniya ang mga sakop sa Integrity Monitoring and Enhancement Group (IMEG) 7.
Si Colita nagpusil sa kaugalingon mga alas 9 pasado sa gabii sa samang adlaw samtang giingong giimbestigar.
Matod ni Labella nga duna gihapon siyay pagsalig sa kapulisan kay pipila lang ang mga badlungon. “There are still good policemen,” matod sa mayor.
Gawas sa pasangil nga siya gi-rape ni Colita, iyang giakusahan kini ug laing 10 ka mga kauban nga nihulidap kaniya og P170,000.
Sila si Colita ug kaubanan gipangrelibuhan ug camp restricted sa Police Regional Office (PRO) 7 sa Camp Sergio Osmeña. (REV)