MAAYONG adlaw na sab sa atong mga Supersuki. Laing adlaw'ng Huwebes na sab ta ug walo ka adlaw na lang, mapupos na ang bulan sa Abril.
Sa bulan sa Oktubre, magsugod na pag-file ang mga kandidato sa ilang Certificate of Candidacy sa buhatan sa Commission on Election (Comelec) alang sa Presidential Elections sa 2022.
Daw hilom ang pundok sa kontra partido sa gobyerno ug wala pay klaro nga kasikas kinsa gyud ang posible nga ilang padaganon aron pagbawi sa gahum gikan sa kamot ni President Rody Duterte samtang nagapadayon ang pagtuyok sa mga nagaduso kang Mayor Sara Duterte nga padaganon sa umaabot nga eleksiyon.
Sa diyutay nga kahilom, mitumaw ang Community Pantry didto sa Dakbayan sa Quezon ug nabaniog sa tibuok nasud kay dako ang gitan-aw nga tabang niini sa katawhan nga apektado sa Covid-19 pandemic.
Gipakita kunohay ang kinaiya sa mga Pinoy nga andam makigsimpatiya sa mga nag-ilaid sa kalisud ug sa Community Pantry, ilang makaplagan ang sulbad sa gibati nga kagutom kay puwede ra mokuha og mga butang makaon, magulay ug uban pa, masulbad ang imong problema bisan wala kay kuwarta.
Dali nga mikuyanap sa ubang bahin sa nasud ang Community Pantry, gani man dunay misundog sa dalang Roxas Avenue sa dakbayan sa Davao.
Ang pagkamugna sa Community Pantry giubanan sa mga pulong pagpanaway gikan sa mga kritiko sa gobyerno nga kuno nagpakita lang kini nga inutil ang gobyerno sa paghatag sulbad sa panginahanglan sa mga kabus panahon sa Covid.
Dili ikalimod nga dili gyud makaya sa gobyerno nga duphan ang tanan nga panginahanglan sa katawhan kay dihang gihatagan og bugas, nangita man sila asa ang sud-an?
Dihang dunay mga odong, tinapa ug misua nga gipang-apud-apod, luod kuno kon sige balik-balik ang sud an!
Atong masabot nga walay katagbawan ug walay kahumanan ang handom sa tawo kon sila ray pasagdan.
Makaduda nga ang kamugnaan sa Community Pantry, gipaluyohan sa mga buot mohimo'g isyu nga ikalabay sa gobyerno o kaha ilang gisakyan nga mahimong magdala og politikanhong kolor ang maayong tinguha sa uban nga tinud-anay nga naghandom nga mahimong panalangin alang sa uban.
Karon ang huna-huna sa buhatan sa Department of Interior and Local Government, pakuhaon og permit sa lokal nga gobyerno ang bisan kinsa nga magbuhat og Community Pantry. Ang pangutana husto ba kini nga mga lakang?
Kon ang protocol sa pagkontrol sa pagkuyanap sa virus sa Covid, unsaon man pagpahigayon sa contact tracing kon adunay mag-positive sa mga nakaadto sa Community Pantry?
Kinsa man ang pangitaan kon walay mo-ako sa katungod nga maoy nagpasiugda sa Community Pantry sa usa ka dapit?
Kinsa ang mokontrol aron ipatuman ang social distancing aron dili magdasok ang katawhan aron mokuha unsay ilang gikinahanglan?
Maayo tinuod ang katuyoan kon alang kini sa pagtabang sa uban apan sa tanang butang adunay ginatawag nga pros and cons kay ang tanang butang maayo ug dautan, dunay iyang katugbang.
Kon maayo ang tumong sa pagmugna sa Community Pantry, nganong kinahanglan pa man pakapinan ug mga pulong sa pagpangdaut sa uban? Kon sa inyong pagbuhi og mga komento nga aron hugnuon ang kahimtang sa gobyerno ug kini mahimong hinungdan nga magpanuko na hinuon ang uban pag- adto sa maong dapit aron matambalan ang nagkutoy nilang tiyan kay mahadlok nga makit-an sa ilang mga kaubanan nga naa sab dumadapig sa politiko, mahimo na hinuon nga kawang ang maayo nga katuyoan.
Kon ugaling man, ang pagmugna sa Community Pantry, gihimo nga paon alang sa politikanhong katuyoan, makaingon kita nga grabe na ka salbahis sa kagaw sa politika kay bisan ang mga tabangunon, gamiton pa man nga puhonan alang sa mga hinakog ug politikanhon nga katuyoan.