NAGKADAIYANG gimik karon ang pipila ka tawo nga dunay malumo kaayo nga kasingkasing diha sa komunidad sa pagmugna og community pantry.
Ang community pantry nga misikat karon mao kining daw tindahan nga naa ang halos tanang panginahanglanon sa kusina, mga pagkaon, lamas, tuyo, suka, asin, bitsen ug daghan pa.
Di kini baligya apan panghatag, ang mokuha kadto lamang nanginahanglan ug ang kuhaon di sab binulto, taman lamang kung unsa ang kinahanglan aron maangay sa uban.
Sa Davao City, gilusad sa NHA Bangkal ang laing community pantry nga inspired sa Maginhawa Community Pantry aron motabang sa mga labing-nanginahanglan.
Nahimutang ang nasangpit nga pantry sa Wrap N Tea, Block 25 Lot 15 Phase 1 NHA Main Road, Kadayawan Homes, Bangkal, Davao City.
Andam sab modawat ang nagpaluyo sa proyekto og donasyon sama sa gulay, prutas, canned goods o di kaha cash donations.
Sa Facebook post sab ni Ernesto Torrecampom ang main entrance sa Brokenshire College sa Madapo Hills, Father Selga Street, Barangay 8-A Davao City naa sab usa ka community pantry.
Giingon sa iyang kapsiyon nga "Community Extension Service Activity PANAG-AMBIT: MADAPO COMMUNITY PANTRY" diin abli lamang kini gikan alas 8 sa buntag hangtud alas 5 sa hapon.
Luyo niini, gibutyag ni Department of Interior and Local Government Undersecretary Martin Diño nga mokuha og permit sa nagkadaiyang local government units ang mga nagtukod niini aron maseguro nga masunod ang social distancing ug uban pang health protocols batok Covid-19.