Moduwa ang batan-ong Pinoy nga higante nga si Kai Sotto sa Adelaide 36ers sa National Basketball League (NBL) sa Australia.
Mismong ang 36ers ang mianunsyo niini ug gikompirmar kini sa kampo sa 18 anyos ug 7’3’ nga basketbolista.
Sa ilang opisyal nga pamahayag, matod sa 36ers nga nipirma si Sotto og duha ka seasons nga kontrata ug aduna kini option alang sa ikatulong tuig.
Nahimo kining posible pinaagi sa “Special Restricted Player” nga patakaran sa NBL nga gimugna aron makabaton og lig-ong relasyon ang liga sulod sa FIBA Asia region.
“We are delighted to welcome Kai, both to the club and the City of Adelaide. Attracting a player of Kai’s potential from Asia, and more recently the United States, to Adelaide will only enhance the club’s reputation for identifying and developing elite basketball talent,” batbat ni Adelaide chairman Grant Kelley nga napatik sa www.gmanews.tv.
Ang general manager sa 36ers nga si Jeff Van Groningen nagtuo nga taas ang maabot ni Sotto gumikan sa gitas-on ug abilidad niini.
“Kai realizes that he has work ahead of him as all rookies do when coming in to this tough league, but his combination of height and developing skill-set give him every chance to raise his game. With hard work, his ceiling for growth is very high,” asoy ni Groningen.
Sa kasamtangan, ang 36ers naggunit og 10-14 nga rekord nga nagpahiluna kanila sa ikapitong puwesto sa liga, nga adunay siyam ka miyembrong teams.
Ang mogiya ni Sotto sa 36ers mao si American coach Conner Henry, kinsa nakaduwa og kadiyot sa National Basketball Association (NBA) niadtong dekada 80.
Naka-coach sab si Henry sa NBA G League ug hasta sa Orlando Magic sa NBA.
Sama sa US NCAA, ang NBL nahilakip sa mga liga nga nakakaplag na og dekalidad nga mga basketbolista nga nakaduwa sa NBA.
Ang pambatong rookie sa Charlotte Hornets nga si LaMelo Ball nagduwa sa NBL ubos sa kampo sa Illawarra Hawks sa wala pa kini gipili sa Hornets isip 3rd overall pick sa labing ulahing rookie drafting sa NBA.
Matod ni Joel Bell, agent ni Sotto, nga dili pa kuwalipikadong magpalista ang iyang kliyente sa umaabot nga NBA rookie drafting gumikan kay bag-uhay lang kining nigraduwar sa high school.
Gipasabot ni Bell nga ubay-ubay unta nga teams ang ningpadayag og interes nga mokuha kang Sotto kon makaapil pa kini sa 2021 drafting.
Gitataw ni Bell nga sa 2022 pa puwedeng magpa-draft si Sotto sa NBA.
Sa pagduwa ni Sotto sa NBL, gituohang mas mahashasan pa ang abilidad niini.
“It’s gonna be a fantastic situation,” batbat ni Bell. (ESL)