SUPERBALITA CEBU

Balak: Ang Colon usa ka dakong peryahan

ESTER TAPIA

Kanlaon City, Negros Occidental


Ang dalan Colon usa ka dakong peryahan

nga puno sa panan-awon, niadtong dili

makita nga mga alisbo, mga baho,

mga batang nagsul-ob og mga dekolor,

tinapak-tapakang sinina, mga tam-is

nga gapas nga panganod, mga babayeng

sa baratuhong pahumot andam mokaon

og kalayo o kutsilyo, naglatay sa alambre

sa pangindahay.

Adunay manghimalad dinhi nga makasubay

sa lasang sa imong kamot ngadto sa mga

binuksang pultahan, mga tindahan sa duwaan

og mga monyekang ilo nga nagpanawag

sa ilang inahan.

Pagbantay sa mga mangunguot

ug sa mga manglalabni sa mga pansing

bulawan sa imong liog.

May paborito kong madyikero,

magpaulan siya og mga pati

dinhi duol sa sinehan,

ug mokalit lang siya og tungha

sa mga eskinang tapokanan,

moapod-apod sa mga baraha

sa kinabuhi o kamatayon.

Ang swertehon iyang tunolan

og usa ka pungpong nga bulak

gikan sa iyang taas nga bukton,

ug niadtong gidimalas, kansang

kasub-anan iyang nakit-an

nga nagpahipi sa buko-buko,

usa ka blangko ug puti nga

panyong palaran.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph