Sugilanon: Kawatan nga may konsensiya

ALCEA MANINGO

Cangyan, Carmen, Cebu

Alas nuybe imedya sa buntag. Nag-abot ang duha ka batan-ong lalake nga himasa og SUPERBALITA. Sila si Boyet ug Tibong puros mga drayber og habalhabal. Nagdungan silag parking sa ilang mga motorsiklo sa tuong daplin sa karsada sa Liloan tungod gayud sa newsstand ni Leclec. Diha sila sa tuong habig sa karsada paingon sa Consolacion. Nagdungan silag kanaog sa tagsa-tagsa nila ka motorsiklo. Hapit magkapakong ang ilang mga ulo sa ilang paghawong sa lamesa ni Leclec nga giladlaran sa mga mantalaan.

Kasagaran alas utso pa sa buntag mahurot nag kahalin ang tindang mga mantalaan ni Leclec. Karon may duha pa ka kopya sa Superbalita diha sa ibabaw sa lamesa. Naatol nga wa si Leclec sa tindahan ning higayuna. Kasagaran maglingkod ra siya tungod sa lamesa nga mag-atubang sa karsada.

“Hain man diay ang tindera?” sukot ni Boyet.

“Wa ko kahibawo,” ni Tibong.

“Basig nitubag sa sugo sa lawas,” ni Boyet.

“Malagmit,” ni Tibong nga nagpahiyom. Ang iyang pahiyom sama sa pahiyom sa buaya. Milingi-lingi siya sa palibot ug mingisi nga miingon, “Ato hinuon ning kawaton.”

Naggunit na si Boyet sa kopya sa Superbalita. Iyang gipakli-pakli ang mga panid.

“Sumala nimo,” matod ni Boyet, “pero ako, inig kawat nako, ibilin nako ang diyes pesos nga coin sa lamesa.” Mikuot si Boyet sa iyang bulsa ug gibutang diyes pesos nga biyugol sa lamesa. Unya miuna siya paglakaw bitbit ang mantalaan. Mipadulong siya sa gi-parkingan sa iyang motorsiklo. Limpiyo ang iyang konsensiya. Wa na siya magtagad kon mibilin ba si Tibong og bayad. “Iya nang kargo de konsensiya kon tinud-on gyud niyag kawat ang mantalaan!” tuaw ni Boyet. Mikabayo siya sa motorsiklo ug mi-krang. Gipilo niya ang Superbalita ug gisuksok sa walang bulsa sa iyang maong nga karsones. Gipaandar niya ang motorsiklo ug midagan kini sa hapsay nga karsada. (KATAPUSAN)