Nahibawo ka ba kon pila ka mga senior citizens sa dakbayan sa Sugbo ang nataptan ug nakabsan sa ilang kinabuhi gumikan sa coronavirus disease 2019 (Covid)-19?
Base sa talaan sa Emergency Operations Center (EOC) nikabat na og 3,133 ka mga hamtong nga nag-edad og 60 pataas ang natakboyan sa virus sukad niadtong Marso, 2020.
Sa maong gidaghanon, 496 kanila ang namatay kun 16% mortality rate apan sila ang naglangkob sa 60% nga mortality rate sa kinatibuk-an nga nakabsan sa kinabuhi gumikan sa Covid-19.
Sa kasamtangan, ang Cebu City adunay 826 ka mga tawo ang namatay gikan sa 22,791 nga nataptan sa maong sakit dihang niabot ang Covid 19 14 ka buwan na ang nakalabay diin nakarecover na sab ang ang 21,257 ka mga individual gikan sa 237, 724 nga gikuhaan og sample.
Sa 14 ka buwan nga miagi, ang Hunyo 2020 (3,89),Pebrero (4,918) ug Marso 2021 (4,136) maoy adunay labing daghan og Covid cases.
Ang Hunyo maoy adunay labing daghan og nangamatay nga niabot og 366 kun 11.47% mortality rate samtang ang buwan sa Disyembre 2020 maoy adunay labing ubos nga nataptan og kaso nga niabot nalang og 178 ug upat kanila ang namatay.
Si Konsehal Joel Garganera, deputy chief implementer sa EOC kinsa maoy gitahasan ni Mayor Edgardo Labella sa pag-atiman sa mga problema batok Covid-19, padayon nga nanawagan sa publiko nga pabilin nga magbinantayon, mosunod sa minimum health protocol sanglit anaa gihapon ang virus. (PAC)