Gibutyag ni Dr. Agnes Realiza, pangulo sa City Health Office (CHO) sa dakbayan sa Lapu-Lapu, nga ilang nabantayan nga daghan ang senior citizens nga nagpakuna itandi niadtong schedule sa medical frontliners ug barangay health workers.
Base sa una pa lang duha ka adlaw, moabot na sa 528 ka mga senior citizen ang nabakunahan sa target nga 1,280 karong semanaha.
Ang naasoyng target gibase lang usab sa kagamhanan sa gidaghanon sa bakuna nga ilang nadawat sa pagkakaron gikan sa Department of Health (DOH-7_.
Sa pagkakaron wala pay taho nga nadawat ang City Health Office sa mga posibleng nakasinati og side effects.
Gawas sa senior citizens apil sa giatiman sa CHO mao usab ang mga persons with comorbidities mga makonsiderar usab mga high risk.
“First come first serve sa ta since limited pa ang atoa doses kung wala sila makapa register online pwede sad register onsite,” matod ni Realiza.
Dugang ni Realiza nga kon ugaling daghan ang nagpabakuna sa dakbayan nga senior citizens ug persons with comorbidities sukwahi kini sa mga medical frontliners.
Kini gumikan kay base sa ilang naobserbaran moabot lang sa 65 porsyento ang nagpabakuna sa medical frontliners. Wala kini makapasar sa rekisitos sa DOH-7 nga kinahanglan 70 porsyento sa mga medical frontliners ang mabakunahan.
Nakatampo sa ubos nga datus ang gamay nga nagpabakuna nga mga Barangay Health Worker (BHW) butang nga gikasagmuyo ni Nagiel Bañacia, pangulo sa City Disaster Risk Reduction and Management Office (CDRRMO).
Ang dakbayan sa Sugbo nakabakuna na og 87 porsyento sa mga medical frontliners samtang ang Mandaue nakapabakuna na usab og 82 porsyento.
Si Lapu-Lapu City Mayor Junard Chan sa iyang bahin mibutyag nga dili pa uwahi ang tanan nga makombinisir ang ang ubang medical frontliners nga magpabakuna.
Dili usab makiangayon alang kaniya kon ugaling ang dili nila magpabakuna ang rason nga matangtang sila sa trabaho sanglit ila man usab kini nga katungod.
“Well we will encourage them it’s a matter of education lang atong ipasabot nato..” matod ni Chan. (GCM)