Kinsa man ang naghulga ni Ritchie Nepomuceno, ang iyang kanhi kapuyo nga giingong drug lord o ang pulis nga naghikog pipila ka mga oras human siya patya?
Sa kapulisan, si Nepomuceno giingong nitug-an nga siya gihulgang patyon sa iyang kanhi kapuyo nga drug lord.
Apan sa Commission on Human Rights (CHR), si Nepomuceno nitug-an nga si anhing Police Staff Sergeant Celso Colita nihulga kaniyang patyon human niya kini gireklamo og rape ug hulidap.
Matod ni CHR chief investigator manlalaban Leo Villarino nga si Nepomuceno nitug-an kaniya nga nakadawat siya og tawag ni Colita nga naghulga kaniyang patyon siya.
Si Villarino nitug-an usab nga siya nalambigit usa ka Reggie Labajo, apan sa ilang pagsusi nabilanggo na kini sa Cebu City Jail sa 2016 pa.
Wa usab mohisgot si Nepomuceno nga siya gihulga ni Labajo dihang nangayog tabang kanila ang babaye.
Sa kapulisan, padayon nga duha ka mga anggulo ang ilang gisubay, love triangle ug drugas.
Si Cebu City police chief Colonel Josefino Ligan nibutyag nga sa ilang imbestigasyon, si Nepomuceno mao ang bodegera sa shabu ug tigdeposito sa halin.
Gibutyag ni Ligan nga maabtan og tag lima ka kilo si Nepomuceno matag semana.
“Information gathered namo maabtan na siyag tag lima ka kilo (shabu) sa usa ka semana, dako nani kay with in a week kung naa kay lima ka kilos ang imong network ani taas na,” matod ni Ligan.
Ning ilang kasayuran, ilang gisusi ang kalambigitan sa drug lord nga kanhi kapuyo ni Nepomuceno sa kamatayon niini.
Matod ni Ligan nga si Police Major Alejandro Batobalonos nakahisgot nga si Nepomuceno nitug-an kaniya nga makigbuwag na unta siya sa drug lord, apan gihulga siyang patyon.
Wa motug-an si Ligan kinsa ang ngan sa drug lord, kon si Labajo ba ang ilang buot pasabot.