Duha ka mga Sugboanon ang nangamatay ug duha usab ang ning-survive sa pagkasangad sa usa ka barkong cargo sa lungsod sa Malimono, lalawigan sa Surigao del Norte sa Lunes sa hapon, Abril 19,2021.
Sila si Norman Galon, taga Galaxy, Maguikay, Mandaue City ug si Mark Evan Cuesta, taga Brgy. Maslog, Dakbayan sa Danao.
Samtang ang survivors mao sila si Jojie Villanueva, taga Barangay Linao, Dakbayan sa Talisay ug si Felipe Queben, taga lungsod sa Asturias.
Ang upat ka mga Sugboanon mga tripolante sa LCT Cebu Great Ocean, kansang padulngan ug gigikanan wa pa mahibaw-i kay ang mga chat ug tawag sa Abril 21 sa Cebu Coast Guard Station wa tubaga.
Ang duha nga nangamatay apil sa upat ka mga tripolante nga nangamatay.
Si Galon, electrian sa barko, nabangalan sa baybayon sa Barangay Balite, San Francisco, Surigao del Norte.
Si Cuesta nakit-an sa Barangay Mabua, Surigao City.
Sa pagsuwat ning taho, labing minos 10 pa ka mga tripolante ang missing.
Ang LCT Cebu Great Ocean gikuso-kuso sa dagkong mga bawod tungod sa bagyong Bising samtang naglawig sa kadagatan karga ang nickel ore ug 2,000 litros sa diesel.
Sa uwahing report sa Philippine Coast Guard (PCG) station sa Surigao Del Norte, laing nangamatay giilang sila si Michael Inoc, nakit-an sa Barangay Jubgan, San Francisco ug Jose Sherwin Laniba, nakit-an sa Barangay Jubgan, San Francisco.
Samtang laing mga naluwas sa hìtabo mao sila si Noli Labucay, Roger Polo, chief mate, Arjie Bacarra, John Renzo Guanzon ug Junmar Galeos.