Dili maayo ang sistema nga gipatuman sa Cebu City kalabot sa pagparehistro sa mga senior citizen nga angay bakunahan. Mao usab kini ang reklamo sa akong higalang kolumnista nga si Atty. Elias Espinosa sa SunStar ug Superbalita. Naglibog siya, sama kanako, kon giunsa pagpahibawo ang mga senior asa sila moparehistro.
Nakompirmar kini sa dihang gilusad sa Siyudad ang laing website www.PaBakunaTa.com alang sa pagparehistro online sa magpabakuna. Suma ni Cerwin Eviota sa Cebu Citizens Initiative, information, education campaign (IEC) cluster sa City Vaccine Board, gihimo kini kay ang online address sa Management Information and Computer Services (MICS) lisud kuno i-memorize. Naa usay mga poster ug tarpaulin diin nag-awhag si Arsobispo Jose Palma sa pagpabakuna.
Nganong karon pa man ni gihimo? Tungod ba kay luya ang mga gitugyanan sa pagkampanya alang niining maong kalihukan? Unya hain na man kadtong house-to-house nga himuon kuno sa taga City Health Department?
Si Kapitan Dennes Tabar sa Barangay Banilad nakalitan sa dihang gipahibawo siya nga sa pagka-ugma dayon himuon ang pagpamakuna sa iyang mga konstituwente. Daghan siyag pangutana nganong ura-urada man ang pahibawo nga dili man lalim ang pagpahibawo sa mga senior nga magpabakuna kay daku man usab ang iyang barangay. Dili usab masiguro kon makalugar ba ang mga senior sa maong adlaw. Duna say mga pangutana sa lainlaing numero nga gihatag sa city health ug ni Konsehal David Tumulak sa unang adlaw sa pagbakuna. Ang city health officer miangkon nga 786 ka seniors ang nabakunahan samtang si Tumulak niingon nga 634. Abi to nako og 400 ngadto sa 500 ra ang bakunahan sa unang adlaw. Kinsa man ning sobra, mga suod sa gobiyerno? Please, tarunga nang inyong trabaho!
Dunay report nga aduna kunoy mga retired ug active military ug police officers nga dili na mosopurta kang Presidente Rodrigo Duterte tungod kay way gihimo ang Presidente sa mga barko sa China nga giangkla sa West Philippine Sea.
Dili na lang ko mutoki og unsay gihimo sa atong gobiyerno kalabut niini. Ako lang ipahibawo nga kining giingong withdrawal of support sa ubang mga uniformed officials dili maingon nga fake news. Dili ikalimod nga aduna gayuy mga sakop sa military nga wala makagusto sa Presidente tungod sa baruganan niini pabor sa China ug batok sa Estadus Unidos (US). Angay masayran nga daghang mga dagkung opisyal sa military ug kapulisan nga gitanyagan og scholarship ug training didto sa America. Ang uban motawag kanilag Amboy kun American boy.
Sila nasayud nga walay kudeta nga molampos kon dili duyogan sa bagang katawhan sama sa gihimo ni kanhi Army Col. Gringo Honasan ug Antonio Trillanes sa Magdalo.