Gumikan sa krisis nga atong giatubang karon nunot ning pandemiya, daghan ang nahuna-hunaan sa atong kaigsuonan aron lang makatabang sa iyang isig-kaingon. Kini gumikan usab sa hinay o wala nay ayuda gikan sa kagamhanan. Mikatap sa tibuok nasud kining gitawag og ‘community pantries’. Ang konsepto mao nga kinsa tong abunda o naa, mo-share o mopaambit sa iyang grasya sa mga wala. Ilang i-display ang bisan unsang tabang, labi pa in kind o goods, unya ang nagkinahanglan moduol lang ug mokuha depende sa panginahanglan sa maong adlaw.
Dunay nag-ingon nga kitang mga Pinoy naghinobra ang atong pagka political animal nga bisan unsa na lang sa atong kalihokan, pulos may labot sa pulitika. Ehemplo kon mosuporta kag pulitiko sa
kampaniya, kinahanglang bayran kag trabaho kon magdaog na. Kanang mopliti ka sa jeep para sa imong kasakay nga amigo, ingnon dayon ka: Unsa man, modagan ka sa eleksiyon?
Kon mohimo kag kaayuhan sa imong silingan, dili mawala ang pagduda nga aduna kay gipaabot nga ganti sa imong gihimo. Ilabi na gyod kon politiko na kang daan. Pero kining pagpanggawas sa community pantries sa nagkalain-laing lugar maoy usa ka lahi nga talan-awon. Lahi kay yanong mga tawo ang nagpasiugda aron sa ilang kaugalingon makasugod pagpanabang sa ubang mga tawo taliwala ning krisis nga atong giatubang.
BAHIN-BAHIN LANG POD
Subo lang kaayo nga dunay uban miila niini nga pagpahimulos o pamulitika. Ang termino nga ‘pamulitika’ adunay duha ka kahulogan. Unang kahulogan mao ang negatibong kahulogon sa pamulitika nga mao ang pagtinguha og politikanhong gahom sa umaabot. Ug ikaduhang kahulogan, ang ‘technical’ nga kahulogan sa politika, mao ang relasyon sa usa ka tawo ngadto sa gobiyerno.
Maayo baya kining konsepto sa ‘community pantry’. Apan ang uban mopahimulos lang. Tiaw ba nimo kanang sa kaulohan dihay mga babaye nga nag-viral sa social media nga mikuha sa halos tanan nga gi-display. Aw, hurot. Hastang lamesa hapit na alsahon ug dalhon. Dili lang pod ta mag-iningon ana. Bahin-bahin lang pod. (bobbygnalzaro@gmail.com)