Editoryal: Simbolo sa gugma

Editoryal Kartoon ni Gilbert Manantan
Editoryal Kartoon ni Gilbert Manantan

Palpak ang Armed Forces of the Philippines (AFP) sa ilang pag red tag sa usa ka sa community organizer nga nagbutang og mga community pantry sa Metro Manila alang sa mga kabos nga naglisod sa panginabuhi tungod sa lockdown.

Inay daygon, gitumbok na hinuon sa AFP nga walhon si Patricia Non, usa sa mga community organizer nga nagbutang og community pantry.

Ang pantry susama og usa ka tindahan sa basic goods, naa ang nag-unang mga palaliton sama sa mga utanon, kape, gatas ug uban pa nga makatambal sa kagutom. Lahi sa usa ka tindahan, libre ang tanan, apan ang imong makuha kutob lang sa imong panginahanglan, gawas kon baga ka og nawong.

Tungod sa kontrobersiya, nanurok na hinuon sa nagkadaiyang mga dapit sa nasod ang mga community pantry nga naimpluwensya sa gibuhat ni Non ug sa ubang mga organizer. Bisan dinhi sa Dakbayan sa Sugbo ug ang administrasyon ni Mayor Edgardo Labella, nadani usab sa pagbutang og pantry tungod kay nadasig ang Carbon vendors.

Di lang baya ang mga walhon ang maayo og organizing ug manabang sa mga kabos. Namatud-an na sa nangaging dagkong mga katalagman nga bisan ang ordinaryong mga Pinoy nga natandog sa kahimtang sa mga apektado ang nitabang. Kon gamay ra silag kwarta, mobulontaryo sila sa pagtabang sama sa pagpamutos ug distribution.

Ang red tagging wa makatabang sa imahe sa AFP, nakatibhang na hinuon sa ilang kridibilidad. Bisan ibutang tang dunay sosyalistang panglangtaw si Non, di tanang walhon komunista o nakig-abin sa mga rebeldeng komunista.

Bisan si Senador Lawrence “Bong” Go midayeg sa community organizers nga nagpasiugda sa community pantries. Nakakita siya nga sa kalisod karon, ang ginagmay nga abag alang sa mga kabos dakog ikatabang sa kutoy nga tiyan. Ang red-tagging makaguba sa maayong tinguha ug motibo nga nagpakita sa gugma.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph