Padayon sa pagpanawat og mga estduyante ang Yaw-Yan Ardigma Cebu Summer Clinic sa Yaw-Yan headquarters nga nahimutang sa fourth floor sa Coast Pacific Downtown Center atbang sa University of Cebu (UC)-Main sa dalan Sanciangko dakbayan sa Sugbo.

Matod ni Yaw-Yan ArDigma founder Master Benigno “Ekin” R. Caniga, Jr. nga gawas sa nagkadaiyang natad sa martial arts, makat-unan sab sa ilang mga estudyante ang importansya sa paghatag og respeto ug maayong pagtagad sa isig ka tawo.

Gitataw ni Master Ekin nga ning panahon sa pandemya, ilang estriktong ipatuman ang safety ug health protocols sa pagpadagan sa summer clinic, nga adunay tema nga “Values Development Through Sports.”

Ang Yaw-Yan, nga kinutlo gikan sa linya nga “Sayaw ng Kamatayan”, usa ka natad sa martial arts nga lumad sa Pilipinas.

Opisyal kining gipaila ni anhing Grandmaster Napoleon “Nap” Fernandez sa publiko niadtong 1972 sa kaulohan.

Gawas sa Yaw-Yan Ardigma system, mahimo sab makat-unan sa summer clinic ang arnis/eskrima, boxing fitness, mixed martial arts, Yaw-Yan combat alang sa self defense, full-contact system, ug tactical self-defense.

Sa mga interesadong magparehistro, mahimong mokontak sa 0943-6568900 alang sa dugang mga detalye. (ESL)