Sinati-a ang kinabuhi sa panguma nga nahimutang sa Barangay Ampongol, lungsod sa Sogod, amihanang bahin sa lalawigan Sugbo.
Mao kini ang Rise and Rebuild Int’l Foundation Inc. (Sogod Garden), nga adunay gilapdon nga siyam ka ektarya nga luna nga pang-agrikultural.
Apan ang ilang abot nga prutas ug utanon, poultry ug meat products dili ibaligya sa kamerkadohan.
Nahisama sa usa ka lapad nga community pantry ang Sogod Garden kay ang ilang mga ma-harvest o ani gitagana alang sa mga kabus ug ngadto sa malnourished nga kabataan.
Gawas sa maong katuyo-an nakahatag sab og panarbaho ang maong foundation ngadto sa mga lokal o mga residente nga gisuholan aron motrabaho sa maong umahan.
FOUNDATION
Gitug-an sa farm manager sa Rise and Rebuild Foundation-Cebu, Randolf Pagaran nga ang maong foundation gisugdan sa magtiayong Ray ug Debra Goodson.
Unang nakabaton og lapad nga umahan niadtong 2013 sa lalawigan sa Leyte sa dihang nagtukod sila og Nutrition Center, Babatngon, Leyte.
Gisundan ngadto sa lalawigan sa Tarlac ug niadto lang Marso 2020 natukod sa lungsod sa Sogod, Sugbo.
Katuyoan sa maong foundation mao nga kahatagan og sustansiyado nga pagkaon kadtong kabataan nga gihulagway nga kuwang sa nutrisyon.
Nagtinguha ang foundation nga mopakaon og kabataan matag adlaw.
“... with a goal to feed 100,000 children everyday,” matod ni Ray Goodson, CEO - Rise and Rebuild International Foundation.
Matod pa ni Pagaran nga pipila ka Nutrition Centers sa nagkadaiyang munisipalidad sa Sugbo ang nakadawat og libre nga supply gikan sa ilang umahan.
Ang foundation maoy mopreparar sa pagkaon, pagluto ug pagpang apod-apod ngadto sa kabataan.
Sayo ning semanaha, gilusad ang Rise and Rebuild Foundation – Cebu nga gitambungan ni Sogod Mayor Richard Estregan ug ubang opisyal sa lungsod, Elder ug Sister Whitmore nga nag-represent sa
LDS Charities, Elder Edwin Butch Colipapa sa LDS Public Affairs (Cebu East) ug mga miyembro sa The Church of Jesus Christ of Latter-Day Saints, gipangulohan sa Lilo-an Stake President Elmer Juntilla.
SUROYANAN
Modawat og mga bisita o kadtong buot moduaw sa area ang libreng makasuroy – suroy sa Sogod Garden.
Kon mataymingan nga adunay harvest makadala sab og lagutmon o abot sa maong uma.
Makita ang nagkadaiyang klase sa utanon o lagutmon aduna say piggery, poultry ug tilapia.
Ang mga trabahante nga residente ra usab sa maong dapit gibansay-bansay sa farming nga maoy niatiman sa Sogod Garden.
Ang manager sa farm maabi-abihon kaayo ngadto sa mga bisita nga mohatag og pagtulon-an o tips sa pananom ug pagbuhi og kahayopan. /
CONTRIBUTOR
Norman V. Mendoza - 48, graduwado sa kursong Commerce ug kasamtangang radio reporter sa RGMA Network Inc. (DYSS) nga taga-Barangay Paknaan, Mandaue City kinsa mahilig sab magsuroy-suroy.