DILI mominos 18 ka teller sa ilegal nga small town lottery (STL) ang nasakmitan sa pag-isyu og numero sa sugal samtang, ang Kapulisan sa siyudad sa Sugbo misuporta sa community pantry diin giawhag ang publiko nga modonar aron ipanghatag sa mga kabus nga labing naapektohan ning panahon sa pandemic.
Ang Philippine Charity Sweepstakes Office (PCSO) 7 nagpasalamat sa dinalian nga aksyon sa kapulisan sa siyudad sa Sugbo pagsikop sa mga ilegal nga STL outlet apan gigamyan ra sila sa gidaghanon nga nadakpan.
Sa miaging semana, nimando si Mayor Edgardo Labella sa kapulisan sa ilegal nga STL.
Gipahibawo ni Police Colonel Josefino Ligan sa Cebu City Police Office (CCPO), dihang nadawat nila ang reklamo, mipagawas dayon siyag kamandoan alang sa onse ka station commanders nga pandakpon ang bisan unsa nga matang sa ilegal nga sugal sa ilang hurisdiksyon.
Tungod niini, gipasalamatan ni Glen Jesus Rada branch manager sa Cebu City PCSO, ang kapulisan nga sa dinalian nga aksyon sa ilang reklamo ug dako na kinig tabang ilabi na sa pag puhag sa padayon nga operation sa illegal numbers game.
Lakip sa ilang gipasalamatan si nga naminaw sa ilang reklamo.
Apan gitug-an ni Rada nga ang 18 nga nadakpan sa kapulisan kuwang pa kini kay sa ilang monitoring daghan pa ang makita nga stalls nga naa sa daplin sa karsada ug sa mga suok sa kabarangayan nga nagpadayon sa pag-operate.
Nanghinaot si Rada niadtong mga nag padagan sa ilegal nga sugal nga moundang nalang aron dili sila ma bilango tungod kay padayon nga mohingusog ang pcso uban sa kapulisan batok sa dili awtorisado nga STL.
Sa laing bahin, walay pagsupak ang kapulisan sa bayanihan sa katawhan ning panahon sa pandemya diin daghan ang apektado ug nawad-an og panginabuhian.
Ang mga batan-on nga opisyal sa Barangay sa Guadalupe ug pribadong indibidwal sa Tisa ang mipasiugda og community pantry diin manawat silag oods aron ilang ipahimutang daplin sa karsada diin kadtong mga nagkinahanglan mokuha lang nga igo sa ilang pamilya.
Ang market operation division (MOD) sa dakbayan sa Sugbo molusad sa City Hall pantry at your door step” kansang mga produktong agrikultura libreng ihatag sa katawhan.
Kini ang gipahibawo ni Market Administrator Irvin Cabales kinsa nakigtagbo na kagahapon sa mga vendors kinsa maoy mo-donate sa ilang produkto nga wala mahalin sa ilang pagpaninda.
Si Labella maoy nihatag og direktiba ni Cabales aron matabangan ang labing nagkinahanglan bisan sa ginagmay nga paagi.
Unang adtuon sa City Hall pantry at your door step mao ang pier area sanglit naobserbahan ni Cabales nga angay tabangan ang mga molupyo nga nagbase sa maong area.
'Giklaro usab ni Labella nga dili na magkinahanglan og permit kadtong mga korporasyon, individual nga mohimo og comnunity pantry aron matabangan ang ilang mga silingan apan kinahanglan lang mga mananghid o makigtambayayong sa ilang barangay. (AYB, PAC)