Pwerteng bun-oga sa usa ka taxi driver nga giingong nisuway sa pagkawat sa duha ka mga tangke sa acetylene ug oxygen tank sa Huwebes, Abril 22, 2021 sa Barangay Jaclupan, Dakbayan sa Talisay.
Nabun-og nang naabtan sa kapulisan si Joel Culaniban, 31, taga Barangay Talamban, Dakbayan sa Sugbo human kulataha sa mga tawo.
Si Culaniban nasakpan sa mga tawo sa dapit nga iyang gikarga ang duha ka mga tangke nga iyang naagian sa dalan.
Giangkon ni Culaniban sa interbyu sa GMA 7 Balitang Bisdak nga iyang gikuha ang duha ka mga tangke nga dagko kay nagtuo siyang wa na kini gamita.
Matod niya nga iya kining gibuhat tungod sa kalisod ug kagamay na sa kita sa pagpamasahero, sagad moabot lang og P200 ang masobra kaniya. / REV
Nanghinaut siyang mapasaylo.
Apan si Talisay City police chief Lt. Colonel Gerard Ace Pelare niingon nga ilang susihon kon di ba kini modus ni Culaniban.
“Nakita namo nga daghan ang ingon ani nga insidente sa ubang areas like San Fernando and Carcar. Magdala’g taxi ang suspect dayon mangawat. With the arrest of this fellow, we can now solve these cases,” matod ni Pelare sa samang interbyu sa sibyaanan. / REV