Gibauran ug gipahimangnoan ni Cebu Governor Gwendolyn Garcia ang mga kontraktor nga bawion ang ilang delays sa road concreting projects sa kalungsoran sa Lalawigan sa Sugbo.
Kini human nga nasuta sa gobernador nga wa pa makaapas sa schedule ang mga kontraktor sa pagsemento sa kadalanan. Gihatagan sila ni Garcia kutob Mayo 5 aron mabawi ang ilang negative slippage kun kalangay.
Atol sa tigum nga gipatawag sa gobernador nga gitambongan sa nagkalainlaing construction companies, nihatag ang mga kontraktor sa ilang mga rason kon nganong sila nalangay.
Matod ni Garcia nga dili rason ang kakuwangon sa tawo, sa ekipo ug bati nga panahon tungod kay adunay mga kotraktor nga nagpagamit na sa ilang lisensya aron ipa-subcontract ang proyekto.
Niini, sila gipahimangnoan sa gobernador nga mosangko sa di na pagpaapil kanila sa mga proyekto sa Lalawigan sa Sugbo kon masubli pa.
“Ngano man gyud nga inyo pa na ipa sub-contract? I really hate that. If I found out again in the next round nga inyo nang ipagamit ang inyong lisensya, you will be automatically disqualified,” matod ni Garcia pinaagi sa opisyal nga news outlet sa Kapitolyo, Sugbo News.
Dugang ni Garcia nga dili na angay pang langaylangayon ang pagpasemento sa kadalanan tungod kay aduna pay daghang road concreting projects nga himuon alang sa 2021.
Si Garcia nipatawag sa tigom aron matino kon unsay hinungdan nganong nalangay paghuman sa mga proyekto.
Ikaduha na kini nga kahigayunan nga gihatag ni Garcia sa mga kontraktor
Base sa datos sa Provincial Engineering Office (PEO), P6 bilyones ang kantidad sa road concreting ug improvement projects ang gigahin sa Probinsya, apan P4.3 bilyones pa ang naimplementar niini.
Ang mga proyekto nga gihuptan sa mga kontraktor nagagikan pa sa supplemental budget niadtong 2019 ug infrastructure budget sa 2020.
Sa 2021, aduna pa’y P8.2 bilyones nga gi-gahin ang kagamhanan alang sa development fund lakip na niini ang mga infrastructure projects ug pagpaagyo sa mga kadalanan.
“Consider this as my first and last warning in the next batch of projects. If I know that you have allowed for your lisensya to be used you will be automatically disqualified,” matod ni Garcia. / ANV