Barangay kapitan ug giingong kabit naaktuhan sa iyang asawa ug mga anak nagdulog sulod sa lawak sa ilang balay alas 11:05 sa gabii Miyerkulis, Abril 21, sa lungsod sa Borbon, amihanang Sugbo.
Ang tinuod nga mga ngan sa barangay kapitan, duha ka mga babaye ug dapit gipugngan ning mantalaan.
Si Kapitan Choi, 49, gipusasan uban sa giingong kabit nga si Nel, 33, dalaga , taga Brgy. Poblacion lungsud sa Borbon.
Giingong sasusama og roydahan sa tigbakay ang balay ni Choi kay gibugno sa iyang asawa nga si Shawie, 45, si Nel.
Si Police Staff Sgt. Lia Balog sa Women’s and Children Protection Desk (WCPD) sa Borbon Police Station nga nahinabi sa Superbalita Cebu nagkanayon nakadawat silag tawag sa hotline nga dunay alarm and scandal sa lugar.
Si Shawie ang nanawag kanila kay nangayog abag. Sa pagrespondi sa ilang kaubanan, naabtan nila sa ancestral home sa kapitan ang kaguliyang.
Dunay nangabun-og, lakip ang asawa sa kapitan, human emotional sa hitabo kay siya mismo ang nakasakop sa duha.
“Nakuyawan na siya unsay nahitabo ni Kapitan kay di na makontak ang selpon. Ang pananghid dunay meeting sa munusipyo. Gikan sa dakbayan sa Sugbo mipauli nalang ang
asawa unya naabtan niya sa kwarto nagdulog,” asoy ni Balog.
PASUMANGIL
Si Shawie nibutyag nga adlawan pa nananghid ang iyang bana nga molakaw kay importante kaayo ang meeting sa munusipyo.
Gumikan niini, si Shawi na lay nagpadagan sa ilang restaurant sa dakbayan sa Sugbo.
Gikulbaan siya kay ngatuo siyang mopauli pagbalik sa dakbayan sa Sugbo si Choi.
Apan wa na niya makontak hinungdan nga uban ang iyang mga anak, sila namauli sa lungsud sa Borbon aron susihon kon naunsa na ang kapitan. Tuod nakurat siya sa iyang naabtan. Si Shawie nibutyag nga si Choi dugay na nga nagbisyo.
Makadaghan na usab niyang nasakpan, apan nangayog pasaylo.
Kasong concubinage ug adultery ingon man kalapasan sa Republic Act (RA) 9262 kun Violation Against Women and Their Children giandam batok sa kapitan ug babaye.
Si Choi nga kuhaan unta sa iyang habi sa Superbalita Cebu nagdumili sa pagluwat og pamahayag kay nagkurog pa siya sa kakuyaw ug wa siya makasabot sa iyang gibati.