NAMATIKDAN ang padayong pagsipa sa ihap sa mga nataptan sa coronavirus disease (Covid-19) sa Dakbayan sa Digos human nadugang ang lima ka bag-ong kaso niadtong Huwebes, Abril 22, 2021.
Gianunsyo sa lokal nga gobyerno nga mokabat na sa 811 ang kinatibuk-ang kaso sa siyudad, diin 735 niini nakarekober.
Natala sab ang 23 ka mga namatay sa dakbayan, anaa pa sa 48 ang admitted sa tambalanan diin 29 ang gisud sa isolation unit ug 97 ang ilawom sa strict home quarantine.
Samtang sa lukop Davao del Sur, mokabat na sa 58 ang namatay tungod sa kagaw ug misipa na sa 78 ang aktibong kaso sa Covid-19.
Sa kinatibuk-an, mokabat sa 1,551 ang nataptan sa kagaw diin 1,415 ang nakarekober.
Sa Davao Region, nagpabiling pinakaubos ang kaso sa Davao Occidental nga anaa lamang sa 225 ang kinatibuk-ang nataptan sa kagaw, apan 216 niini ang nakarekober.
Sa kasamtangan, adunay upat ka aktibong kaso ang maong probinsiya ug lima lamang ang namatay. (Orlando B. Dinoy)