Bisan walay klaro ang pagtambong ni Presidente Rodrigo Duterte sa ika-500 ka kasaulogan sa Kadaugan sa Mactan karong Martes, Abril 27, ang Dakbayan sa Lapu-Lapu nagpadayon sa higpit nga pagpangandam sa seguridad ug pagpatuman sa health protocol.
Mao kini ang gipahibawo ni Lapu-Lapu City Mayor Junard Chan human nasayod gikan sa pangulo sa secretariat sa National Quincentennial Commitee (NQC) nga si Ian Francisco nga posible nga si Executive Secretary Salvador Medialdea maoy mangulo sa delegasyon alang sa presidente.
Samtang, ang Dakbayan nangandam og 4,000 ka mga anti-test ug ubang gikinahanglan sa pagseguro sa kaluwasan sa mga bisita. Alang kang Chan mangandam lang sila hilabi na nga posible pang mausab ang hunahuna sa presidente.
Lakip sa gipaabot nga bisita mga senador ug ubang Cabinet members ni Duterte adunay ipakita nga mga RT-PCR test atol unya sa ilang pag-abot sa Dakbayan sa Lapu-Lapu.
Ang mga senador nga dunay intensiyon nga motambong mao sila si Senador Imee Marcos, Senador Win Gatchalian ug Senador Sonny Angara.
Samtang ang mga Cabinet member nga mipadayag usab nga motambong gawas ni Medialdea mao sila si National Defense Secretary Delfin Lorenza, Secretary Alfonso Cusi sa Department of Energy (DOE) ug Secretary Michael Dino sa Office of the Presidential Assistance for the Visayas (Opav).
Ang uban nga imbitado sa kalihukan nibalibad gumikan sa padayong sitwasyon sa coronavirus disease 2019 (Covid-19) sa kaulohan.
Adunay ipahigayong kalihukan sa Luneta Park sa kaulohan, matod sa NQC, diin gipaabot nga motambong ang mga opisyal nga dili makaadto sa dakbayan. Gipaabot usab nga mopadangat sa iyang mensahe si Presidente Duterte bisan ug dili kini makatambong pinaagi sa virtual.
“As what Sir Ian Francisco (of the National Quincentennial Committee secretariat) said atong Independence Day (June 12) last year ang Presidente nakadecide nga mo-attend niana nang pagka 11 so wala ta kahibawo gyud,” matod ni Chan.
Samtang gibutyag ni Francisco nga duha gihapon ka kalihukan ang mahitabo sa Abril 27.
Una mao ang flag raising ceremony sa Liberty Shrine sa Barangay Mactan nga himuong simultaneous sa ubang lugar sa nasod sa alas 8 sa buntag.
Pagasundan kini sa wreath laying ceremony sa monumento ni Datu Lapu-Lapu ug dayon ang civic military parade.
Human niini mao na ang re-enactment samtang inig ka gabii mao na usab ang Gala night diin taposon sa fireworks display.
Aduna usay ipahigayon nga launching sa commemorative stamp sa ika-500 ka tuig nga Kadaugan sa Mactan ug sa Lapulapu Memorial Shrine and Museum. Ipakita usab nianang adlawa ang Lapulapu National Monument Maquette. (GCM)