Personal nakong nasaksihan si Kapitana Fritzie Arnado nga nangunay og patuman sa mga lagda alang sa mga bisita sa Barangay Tajao, Pinamungajan, Cebu, nga gustong magpalabay sa panahon sa tin-aw ug limpiyo nga dagat sa iyang barangay. Napadpad ko sa maong barangay sa niaging Dominggo.
Akong gibisitahan ang akong manghod nga si Mercy, molupyo sa maong dapit. Sukad sa pagsugod sa pandemya kadto pay unang higayon nga kami nagkita pag-usab sa iyang pinuy-anan nga nahimutang daplin sa baybayon. Kuyog nako si magsisibya Ferdinand Mañus sa ABS-CBN dyAB kaniadto ug karon anchor sa Sibya TV sa Youtube ug Facebook.
Human mi pahibaw-a sa presensiya ni Kapitana Fritzie sa baybayon nagdali ming Ferdy pag-adto sa iyang nahimutangan. Niuban sab namo akong manghod. Sa baybayon, si Kap Fritzie nga gikuyogan ni Chuchi Kyamko, naabtan namo nga naghatag og instruction sa taga pumpboat nga gisakyan sa mga bisita nga mga molupyo sa Barangay Tisa, dakbayan sa Sugbo.
Wala gani mamatikdi sa Kapitana ang among pag-abot. Nabati nako gikan sa iyang baba ang pulong nga “serysohon gyud nato pagtuman ang mga lagda sa Pinamungajan Tourism Office”.
Naatol man sab gud nga nanghasi ang bagyong Bising sa amihanang Sugbo ug klaro kaayong apektado ang dagan sa panahon sa Tajao basi sa nagkusmod nga kalangitan ug dagkong balod niadtong adlawa. Klaro kaayo ang instruction ni Kap Fritzie. Dili pwede nga magpalawod. Dili molawig padulong sa Campalabo sand bar. Labaw sa tanan napulo ra gyud ang mga pasahero sa pump ug ikados ang tigtimon ug engine man. Ang tanan pulos naka life jacket.
Laing pasidaan way molabay og basura sa dagat. Matag pumpboat magbalon og sudlanan sa basura. Ang mga operator hinuon og pumpboat didto apil na ang ilang mga tawo pulos nikuha og lisensiya human niagi og training sa Maritime Industry Authority kun Marina.
Ang laing instruction ni Kap Fritzie mao ang seryosong pagpatuman sa mga health protocols sa tanang tawo sulod og gawas sa mga beach resorts taliwala sa pandemya. Gawas lamang sa mga nitimpasaw na sa dagat sama sa akong nasaksihan sa ilang public beach nga nahimutang sa maong barangay.
Bug-at nga tahas ang gisangon sa mga abaga ni Kap Fritzie ug sa konseho ning panahon nga ang probinsiya sa Sugbo ubos sa liderato ni Gob. Gwen Garcia naningkamot nga makabangon gikan sa grabing kalisdanan sa panginabuhi mugna sa covid19 nga padayong naghulga sa atong panglawas.
Susamang tahas ang gipas-an sa tanang opisyales sa kagamhanang lokal lukop nasod. Dili hinuon tanan ang seryusong nagtuman niini. Kay gani, duna may mga opisyal nga nangadakpan kay imbes mahimong modelo, mao naman hinuoy nag-una una og lapas.
Nakabantay siguro mo nga samtang kita diniyos nga nagsap-ong sa atong ilong ug baba, may mga opisyal nga nag gara gara.
Kang Kap Fritzie salamat sa seryosong serbisyo. Sa mga bisita salamat sa kooperasyon. Sa mga frontliners sa turismo nga naglakip sa mga boatman, resort owners, ilang mga empleyado ug mga molopyo, daghang salamat.