Niabot na dinhi sa Sugbo ang lawas sa usa sa mga tripolanteng Sugboanon nga namatay human masangad ang usa ka cargo ship sa kadagatan sa Surigao del Norte sayo ning semanaha.
Gisugat sa iyang banay ang lawas ni Norman Galon, 35, usa sa unom ka mga tripulante sa LCT Cebu Great Ocean cargo ship nga namatay, dihang niabot agi sa Pier 1, Siyudad sa Sugbo, alas 4:30 sa buntag sa Abril 23, 2021.
Ang lawas ni Norman gidala dayon sa Cosmopolitan Funeral Homes sa wa pa gidala pauli sa ilang balay sa Sitio Galaxy, Barangay Danglag, Consolacion, amihanang Sugbo.
Si Pejy Galon, maguwang ni Norman, niingon sa Superbalita Cebu nga nakurat gihapon sila sa kamatayon sa iyang igsuon.
Giingon niya nga ang katapusang higayon nga ilang nakontak si Norman niadto pang Domingo, Abril 18, 2021.
Gitawgan ni Norman ang iyang asawa nga nagpahibawo nga ang LCT Cebu Great Ocean nagtakilid na tungod sa dagko nga bawod ug kusog nga hangin nga dala sa bagyong Bising.
Matod ni Pejy nga bisan sa sitwasyon ni Norman, ang katapusang mga pulong nga gisulti niini sa iyang pamilya mao ang “Ayaw mo kabalaka nako” sa wa pa naputol ang linya.
Ang sunod nga nahibaw-an sa iyang pamilya mao nga si Norman usa sa gidagsa sa baybayon sa Malimono ug San Francisco sa Surigao del Norte, pinaagi sa social media.
Gituohan ni Pejy nga si Norman wa makalahutay sa paglangoy sa dagkong bawod tungod kay siya nakasinati na niadto nga ma-paralyze.
Sa estudyante pa si Norman mga 15 ka tuig ang nakalabay, naaksidente siya nga miresulta nga nag-blood clot ang iyang utok. Tungod niini, naparalisar si Norman niadto, matod ni Pejay.
Si Norman ang breadwinner sa ilang pamilya. Sa iyang pagkamatay, iyang gibiyaan ang iyang duha ka mga anak, nag-edad og 9 ug 3 anyos ug iyang asawa.
Niingon si Pejy sa Superbalita Cebu nga nabalaka siya sa edukasyon sa iyang mga pag-umangkon tungod kay ang asawa ni Norman way trabaho. (KFD)