Lalakeng akusado sa kasong rape ug giingong sakop sa usa ka kulto nga anti-communist sa dekada 80 napatay samtang angol ang police official atol sa pinusilay dihang gi-serve ang warrant of arrest alas 2:30 sa Biyernes sa kaadlawon, Abril 24, 2021 sa Purok Nangka, Sitio Ilihan, Brgy. Lataban, Lungsod sa Liloan sa Cebu.
Si Arnel Cabahug Capangpangan, 35, minyo, taga Iligan City, giingong sakop sa kultong Sagrado Corazon Senor kun Tadtad, namatay dihang gibawsan sa mga pulis human mapusili si Police Lieutenant Zosimo Ravanes, Jr., team leader sa Anti Kidnapping Group-Visayas Field Unit (AKG-FVU).
Samtang samdan si Marlou Cabahug Capangpangan, 25, igsuon ni Arnel.
Ang mga sakop sa AKG 7, Regional Intelligence Unit (RID) 7 ug Liloan Municipal Police Station ni-serve sa warrant sa kasong rape batok sa tulo ka mga magsuong Capangpangan ug ilang amahan.
Si Police Captain Marvin Inocencio, hepe sa Liloan police nga nahinabi sa Superbalita Cebu, nagkanayon nga ang mga sakop sa Iligan City Police Station nakig-alayon sa AKG7-VFU human nahibaw-an nga diha sa ilang lungsod nagtago ang upat ka mga Capangpangan.
Sila wanted sa kasong rape hinungdan nga ang AKG7-VFU, uban sa RID, nakig-alayon sab nila ug sa ubang unit sa pag-serve sa warrant of arrest.
Ang usa sa mga magsuon ug amahan nagdala og mga pinuti sa pagsibat.
Si Inocencio niingon nga bag-uhay lang naabot ang mga Capangpangan gikan sa Iligan City aron motago dinhi sa Sugbo.
Nagbalay sila sa bukid ug gituohan nila nga dunay mga kabanay o higala nga gidangpan.
Gisusi sab nila karon kon wa bay dugang mga kaso sila sa Iligan City.
Gawas niini, ilang sutaon kon wala ba mang-recruit og mga bag-ong miyembro ang upat.
Sa pagsuwat ning taho, nagpadayon ang manhunt operation batok sa amahan ug anak.
Sa pagsuwat ning taho, wa pay nahatag nga mga ngan si Inocencio sa duha ug background sa kasong rape.
Nipahimangno si Inocencio nga armed and dangerous ang duha kay nagdala og mga pinuti.
Si Ravanes, sa iyang bahin nga nahinabi sa Superbalita Cebu dihang gidala sa tambalanan, nagkanayon nag-alerto sila niadtong higayuna.
Siya ang nag-una dihang i-serve na unta nila ang warrant, apan ang duha ka mga anak duna diay armas. Kalit silang gipamusil hinungdan mga nahitabo ang pinusilay.
“Nagtalikod na ko niadtong higayuna. Sus paglingi nako, nibunot naman sa armas, diretso namusil. Naapeke ko, na-go gyud ko pero nakaluy-an mi sa Ginuo,” asoy ni Ravanes.
Ang bala niungot sa spinal cord ni Ravanes base sa computerized tomography (CT) scan scan hinungdan nga gipaubos siya sa operasyon.
Si Inocencio nagkanayon nga stable na ang kahimtang ni Ravanes.