PUNO sa emosyon ang kasaulogan sa ika-33 nga adlaw nga natawhan ni Ariel Itumay niadtong Abril 12.
Gihulagway ni Ariel nga “best surprise gift” ang iyang nadawat sa maong adlaw.
Gisurprisa siya ug ang iyang pamilya sa ilang kamanghuran nga igsuon nga si Ma. Julyva “Inday”, dihang kalit kini nibutho sa okasyon nga wa nila damha.
Abi ni Ariel nga susama ra sa una nga kamingaw ang kasaulogan sa iyahang birthday human mamatay ang iyahang Lolo, amahan sa iyahang inahan.
Apan matod ni Ariel, “there’s always a rainbow after the rain, na best surprise gift gyud nako kay niuli akong manghud gikan sa Kuwait.”
Ang nahitabo kay giplano na diay daan ni Inday ang pag-uli dinhi sa Sugbo human sa kapin duha ka tuig nga pagtrabaho sa laing nasod, sa Kuwait. Kakonsabo ni Inday, si Leah o Bambi, asawa sa ilang kamaguwangan nga si Socrates Jr.
Ang ilang pamilya gitapok ni Bambi sa House of Lechon, siyudad sa Sugbo, diin dinhi nahitabo ang salo-salo sa paniudto.
Wa damha ni Ariel ug sa ilahang pamilya nga sa dayon nang paniudto, kalit niabot ang ilahang kamanghuran. Si Inday nipaubos una og quarantine sa wala pa magpakita sa iyahang pamilya.
“Bisan og daghan og mga problema, naa diay happiness. Nakaingon ko nga nakumpleto na akong birthday,” paambit ni Ariel.
Sa pag-abot ni Inday, nakurat ang tanan, gawas ni Bambi ug tagsatagsa nga giduol niini ug gigakos ang mga tawo nga naa sa sud.
Wa makapugong sa pagdangoyngoy ang ilahang nanay nga si Jenny kay sa katapusan nakita na niya ang iyahang kamanghurang anak ug bugtong anak nga babaye nga iyahang gikamingawan og maayo.
Napuno sa emosyon ang maong yugto ug bisan si Ariel, wa usab makapugong ug nakahilak labi na nabati niini ang paghilak sa inahan.
Tumang kalipay gyud ang nipasulabi sa venue ug nakumpleto og balik ang pamilyang Itumay. (SCG)