NIADTONG una sa blind item lang nako nabasahan kining mga tsika nga duha ka Kapuso star mo-ambak sa Kapamilya network.
Karon ginganlan na gyud nga ang usa niini mao si Sunshine Dizon nga daghang nahibulong ug natingala kon ngano, kay pila ka tuig naman sab kini nga nagpabiling Kapuso.
Wala pa koy nadunggan nga derechong kompirmasyon apan atong nahibaw-an nga mitambong na kini sa usa ka story conference sa umaabot nga teleserye para sa Kapamilya channel kauban silang Janine Gutierrez ug Paulo Avelino.
Kon madayon man gani kini, nindot nga kombinasyon ang tulo ka mga award winning actor ang atong makita sa usa ka serye.
Nakurat ang tanan sa maong balita lakip na ang mga kauban ni Sunshine nga mga Kapuso stars.
Kon mahinumdoman bata pa kini Kapuso na ang aktres, daghan kini og mga proyekto ug giatiman gyud og maayo ang career sa GMA network.
Pero atong nahibaw-an nga wala na diay gi-renew ang kontrata ni Sunshine Dizon mao nga libre na kining modawat og trabaho gikan sa ubang network.
Ang maong proyekto nga ubanan nilang tulo ka mga kanhi Kapuso nga nahimong Kapamilya siguradong atangan sa tanan.
Siguradong magtigi sa aktingan ang tulo kay pareho man kini silang mananaog isip best actor ug best actress, dinhi makita nato ang katagbawan sa ilang abilidad sa pag-arti.
Kon gipaabot ang unang pag-arti nilang Sunshine ug Janine sa Kapamilya serye, samot pa nga gipaabot ang Paulo human natapos ang iyang serye kauban silang Angelica Panganiban ug Zanjoe Marudo sa “Walang Hanggang Paalam.”
Ang laing Kapuso actress nga nadunggan nato nga may offer nga proyekto sa Kapamilya mao si Lovi Poe kon madayon man gani kini ug dawaton sa actress mahimong katapusang proyekto niya ang “Owe My Love.”
Sama kang Sunshine natapos na usab ang iyang kontrata sa maong network mao nga libre na kini nga modawat og project sa ubang estasyon.
Ato lang paabuton kon unsa gyud ang mga ikasulti o kompirmasyon sa mga hingtungdan, Ay’g Saba!
* * *
Malipayon diay kaayong giangkon ni Derek Ramsay nga nagtipon na sila og puyo karon ni Ellen Adarna ug sa anak ining si Elias.
Gisugilon usab sa actor nga nagkita na sila sa amahan ni Elias nga si John Lloyd Cruz ug gi-congratulate pa silang duha.
Way problema nilang duha ni Lloydie gani kini pa ang makuha ug mohatud kang Elias panahong naa sa amahan ang bata.
Nagkasinabot ug nagkasinabtanay usab silang Ellen ug John Lloyd sa ilang parenting sa anak, mao nga okay ang tanan.
Giplanuhan na usab ni Derek Ramsay sa hinay-hinay ang ilang umaabot nga kaminyuon basta sa pagkakaron malipayon silang nagpuyo sa iyang panimalay, Ay’g Saba!