Diola: Halad

Fr. Carmelo Diola

Binasi sa Buhat 4:8-12; Salmo 118; 1 Juan 3:1-2; Juan 10:11-18

Gasa sa Dios ang kapasidad sa paghalad sa kaugalingon. Ang paghalad naghatag og kahulogan sa kinabuhi. Makahuloganon kaayo ang kinabuhi sa usa ka inahan o amahan nga mohalad sa iyang kaugalingon ngadto sa iyang mga anak. Niadtong Marawi Siege sa 2017, si Kapitan Rommel Sandoval, usa ka Scout Ranger nihalad sa iyang kinabuhi aron mabuhi ang usa niya ka mga sundalo nga napusilan sa mga terorista. Gibutang niya ang iyang samarang lawas ibabaw sa maong sundalo aron dili na kini maigo pa. Nabuhi kini. Makahuloganon ang pagkamatay ni Rommel.

Tawag sa maayong lider ang paghalad sa kaugalingon sa iyang mga sumusunod. Mahitungod sa maayong lider ang Ebanghelyo. Gitandi ang buhat sa paghalad sa kinaiya sa mga mini nga lider. Ang una niini mga lider nga buta kay abi nilag klaro ang ilang panan-aw. Nangulo sila apan nasaag diay sila nga wala nila mahibaloi. Ang laing matang sa mini nga lider mao ang abusado ug mamentaha sa iyang mga sumusunod. Gisalikway sa Ginuo kining matanga sa lider. Mabasa kini sa Ezekiel 34 diin mangunay na mismo ang Ginuo sa pagpangulo sa iyang katawhan.

Makalima gamita ang pulong “halad” sa atong Ebanghelyo. Gawasnon nga gihalad ni Jesus ang iyang kinabuhi ngadto sa iyang katawhan sa pagpakamatay niya sa krus. Gawasnon pod niya kining giuli pinaagi sa iyang pagkabanhaw. Nakaila siya sa iyang mga karnero. Morisgo siya alang kanila. Wala pugsa si Jesus nga mohalad sa iyang kaugalingon. Gawasnong gugma lamang ang nagtukmod kaniya.

Namunga ang paghalad ni Jesus sa iyang kaugalingon sumala sa Mga Buhat. “Ang kaluwasan makaplagan lamang diha kaniya, kay wala nay laing ngalan sa tibuok kalibotan nga gihatag sa Dios ngadto sa katawhan nga makaluwas kanato,” sa mga pulong pa ni Pedro. Ang Ginuo diay maoy magigo sa bunga sa atong mga sakripisyo.

Ug ang paghalad ni Jesus sa iyang kaugalingon nakapadangat sa atong kaluwasan ug kabag-ohan. Gani ang sulat kang Juan nagkanayon, “Kita karon mga anak na sa Dios, apan wala pa nato matino kon maunsa gayod kita. Ang nasayran nato mao nga inigpadayag na ni Cristo mahisama kita kaniya, kay makita man nato siya sa iyang pagkamao gayod.” Lalim mo na, “mahisama kita kaniya”! Ang halad ni Jesus nakapadangat sa atong pagkaanak nga sinagop sa Dios.

Dili mistil mamatay ang tawo aron makahalad sa iyang kaugalingon ngadto sa uban. Niining mga adlawa nasaksihan nato ang pagkuyanap, pananglit, sa gitawag nga mga “community pantries”. Higayon kini sa pagbinayloay og mga halad. Nindot unta kon ilambigit ni natong maong kalihokan sa halad ni Jesus nga naghatag og sumbanan ug sukaranan sa bag-ong tawo ug sa bag-ong katilingban.

Makahuloganon ba ang imong halad sa Dios?

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph