UBAY-UBAY na nga mga community pantry ang nanumaw dinhi mismo sa Sugbo kay nadasig sa unang community pantry sa Maginhawa, UP Village, sa Quezon City.
Lakip niini mao ang upat ka mga community pantry sa grupong Abante Barangay.
Unang nitumaw mao kining Abante Barangay Community Pantry diha sa Aznar Road, Sambag 1. Nasundan kini diha sa Bulacao, Inayawan, ug sa Mambaling.
Naa pay ubang mga pantry sa Syudad sa Sugbo sama sa Guadalupe, Tisa, Lahug, Carbon, ug uban pa. Ang ako lang kay ang mga organizer dapat magbantay lang gyud sa seguridad. Didto sa kaulohan, wa jud ko makasabot sa kapulisan kay nangita hinuon og mga komunista. Mao kini ang nakahulga sa mga community pantry. Kuyawan sab ko sa mga sabotahe.
Kining grupo unta ni Hen. Antonio Parlade, adto pa lang mag-red tag ug mag-profile sa mga Komunista sa West Philippine Sea.
MABAW
Mabawa sab sa sense of justice niining Mayor Edgar Labella, oi. Gibakwi niya dayon ang iyang saad nga motabang sa pamilya sa gipatay nga Ritchie Nepomuceno.
Nasayran gikan sa mga balita, kini si Nepomuceno nireklamo og extortion nga gipasangil batok sa 11 ka mga pulis sa Sawang Calero ug paglugos kaniya sa usa ka pulis. Apan, igo lang hatagan si Labella og taho sa kapulisan nga drug angle, di na siya motabang sa pamilya ni Nepomuceno?
Dayon, lain sab kining isyo kabahin sa usa ka empleyado sa Cebu City Hall nga si Robeth delos Santos. Nadakpan si Santos sa usa ka buy-bust sa Lapu-Lapu City.
Nadakpan si delos Santos nga sakay sa usa ka sakyanan sa City Hall nga dunay pula nga plaka sa miaging Abril 22, 2021.
Nahibong ko nga igo lang ni-recommend si City Legal Rey Gealon nga i-terminate gikan sa iyang pwesto. Pruweba kuno kini nga way undang si Mayor Labella sa iyang paggubat batok sa gidiling drugas.
Mangutana lang ko mayor, di ba imo man kining appointee si delos Santos? Matod pa, kini siya usa ka casual employee sa Department of General Services Equipment Maintenance Program.
Pila ka tuig nga siya nga nagnegusyo og drugas diha? Mayor man ka nga hilig mo-investigate, di ka motan-aw kabahin sa mga operasyon ni delos Santos.
Mayor, kadtong panahon nga mayor pa si Bise Mayor Mike Rama, dako na nga isyo nga dunay suyopanan diha atbang sa Cebu City Hall. Karong imo nang panahon, naay imong appointee nadakpan nga dunay hapit usa ka milyon ka pesos ang bili sa gidiling drugas. (DM @anol_cebu)