PIPILA ka outsourced employees sa Vicente Sotto Memorial Medical Center (VSMMC) ningdangop kanako ug nangayo og panabang sa pagpaningil sa administration sa gisaad nga hazard pay sukad sa pagbuto sa Covid 19 sa miaging tuig. Ang maong mga empliyado, 300 ka buok, mga kawani sa Perfect Clean Janitorial Agency nga gipanag-iya ni Talisay City Councilor Marieta Bucao. Ang uban kanila maoy mo-escort sa mga pasyente nga nagpositibo human magpa-swab test sa maong hospital ug dad-on sa quarantine facilities sa dakbayan sa Sugbo. Makonsidirar gihapon sila nga frontliners.
Matod pa sa mga reklemante nga pagbuto sa Covid 19, gitigom sila ni Atty. Paul Gino Lopez, admin ug legal officer sa VSMMC. Giingong gisaaran nga hatagan og tag P500 matag adlaw. Apan mag-usa ka tuig na lang, wala pa nila madawat ang hazard pay. Karon naningil pa gihapon sila ug gani gipangkasab-an nganong mireklamo diri kanako.
Sa dihang ako kining gihisgutan sa akong tulumanon sa radyo sa DySS, mi-react si Bucao ug mipadayag sa iyang bahin. Matod pa niya nga wa siyay kalibutan sa saad ug wa siya maapil sa maong saad. Kay samtang ang maong mga empliyado ubos sa iyang ahensiya, aduna may uban nilang clients nga mohatag og direktang incentives kanila. Dili na sila manghilabot. Apan kon ipaagi sa ilang agency, ila kining ihatag ngadto sa mga empliyado.
Dili man siguro maningil kining maong mga empliyado kon wala sila saari? Gumikan kay gisaaran man sila, mao nga naningil. Wala motingog ang kadagkuan sa VSMMC kabahin niini, bisan si Atty. Lopez nga gisigihan nako og tawag. Mahadlok man god pod intawon nga magpaila kining maong mga empliyado kay sigurado nga mataktak kay dumtan. Unsa man ni, mahulog sa panultihon nga ‘gihimo ang saad aron lang pakyason?’. Karon, nagtulod-tulod na ang mga kanahan sa VSMMC kay si Presidente Rodrigo Duterte kuno ang misaad, dili sila.
Kay ngano man, si Duterte diay ang mi-atubang sa mga empliyado diha? Kon misaad ang Presidente, dan ila kanang katungod nga mo-follow up sa ilang mga labaw kay sigurado nga nasayod ang mga labaw niini. Nganong dili man nila pahimangnuan ang mga labaw nila sa DOH kabahin sa gisaad sa Presidente? O naa nay budget ani apan gibulsa? (bobbygnalzaro@gmail.com)