NAGBANSIWAG sa social media ang mga hulagway sa usa ka puti nga Toyota Innova nga iya sa Siyudad sa Sugbo nga gigamit sa usa ka gikatahapan nga drug pusher nga nasikop sa buy-bust sa kapulisan sa Dakbayan sa Lapu-Lapu.
Gimaneho ni Robeth de los Santos ang sakyanan ug mao ni ang iyang gigamit sa pag deliver sa drugas ngadto sa mga pulis nga wa niya mailhi. Bisan nanghimakak na siya nga iyang gigamit ang sakyanan sa makadaghan, di gihapon kini makawagtang sa pagtuo sa publiko nga kini iya nang naandan nga gibuhat.
Sa interbyu sa Superbalita Cebu, iyang giangkon nga duna siyay drug transactions sa atubangan mismo sa city hall. Sa ato pa, nagmata og buntag ang mga opisyal sa City Hall? Pwerteng kampanya batok sa illegal drugs sa kabarangayan, apan naa diay mismo sa ilang tugkaran ang durugista.
Lisod usab tuohan nga bag-o lang ini si de los Santos kay matod sa kapulisan sa Dakbayan sa Lapu-Lapu, nangabang sila si de los Santos og balay sa siyudad aron makalikay sa pag-monitor sa kapulisan sa Cebu City. Di lang sa kapulisan, apil na tingali sa iyang mga silingan sa Barangay Suba.
Kon tinuod man ang gisulti sa Lapu-Lapu City police nga duna na siyay kaso sa illegal drugs, bisan iya ning gihimakak, nganong nakalusot man siya sa pagpang-apply sa pagkatrabahante sa Siyudad? Tungod ba kay girekomendar siya sa iyang uyoan nga barangay kapitan sa Suba?
Unsa diay ang pamaagi sa pag-hire og mga kawani sa Cebu City nga malutsan man og durugista? Kay lisod baya kalawaton ang estorya ni de los Santos nga bag-o pa lang siya sa drugas. Lisod sab dawaton nga sweldo ang hinungdan sa iyang pagsulod sa illegal drugs.
Bitaw, mas maayong i-review ang polisiya sa City Hall sa pag hire og mga empleyado ug pagpagamit og sakyanan.