GIBUKSAN sa Police Regional Office 7 ang police sub station nga nahimutang sa sitio Kakha, Barangay Talalak, lungsod sa Santa Catalina, probinsya sa Negros Oriental.
Ang sitio kanhi giila nga no man’s land tungod sa presensya sa mga rebeldeng New People’s Army (NPA) ug way mahatod nga basic services ang gobyerno.
Atol sa gilusad nga Oplan Sauron sa panahon ni kanhi PRO-7 director ug karon hepe na sa Philippine National Police (PNP) General Debold Sinas, adunay mga nakalas nga gitumbok nga NPA sa barangay.
Matod ni Police Brigadier General Ronnie Montejo, kasamtangan nga hepe sa kapulisan sa Central Visayas, nga una nga giplano ni Sinas nga butangan og police precinct.
Pasabot ni Montejo nga sama sa regular nga police station, mahimong mo-blotter ang substation sa mga panghitabo sa barangay ug mga kasikbit nga lugar.
Magbutang siyag 30 ka mga pulis nga maoy mopatuman sa kahusay ug kalinaw sa barangay Talakak uban usab ang presensya sa Regional Mobile Force Company 7.
“Sila ang moatiman sa atong kaigsuonan parte sa mga complaint, mohatag og assistance ug kon adunay alarma, moresponde. Unya naa tay mobile force nga mo alalay usa sa ilaha,” matod ni Montejo.
Gikalipay ni Barangay Kapitan Edmar Bigay ang pag butang nag police substation sanglit dako matod kinig ikatabang sa pagpatunhay sa kalinaw sa ilang lugar.
Giangkon niya nga aduna pay presensya sa NPA sa ubang mga sitio apan usa kini ka maayong sinugdanan.
Kaniadto maglisod sila sa pag taho sa kapulisan kon adunay mga panghitabo sa bukid tungod sa kalisud sa agianan, apan karon di na mahitabo tungod kay naa na sa iyang barangay ang mga pulis.
“Sa una, kon adunay insidente, manaog ta didto, moabot pag 24 hours usa pa nato ma recover kon adunay mga disgrasya. Kon adunay shooting incidents, dili dayon nato mapaabot sa kapulisan,” matod ni Bigay.