NAMATAY ang 12 anyos nga batang lalake nga libud suroy human napusilan sa gwardya Sabado sa alas 5 sa hapon, Abril 25, 2021 sa usa ka construction site sa South Road Properties (SRP) habig sa Barangay Mambaling, Siyudad sa Sugbo.
Ang biktima giila nga si Justine Jay Ferrer, taga sitio Ypil, Barangay San Nicolas, Siyudad sa Sugbo.
Ang bata nakaangkon og usa ka samad pinusilan sa iyang liog.
Matod ni Police Staff Sergeant Renato Baldo nga adunay grupo sa mga bata ang nangohag scrap metal sa MBC construction site.
Adunay gitukod nga establisemento sa dapit.
Sa dihang gibadlong ni Marelle Belano, 29, sakop sa Corps Philippines security agency, gibato matod pa, siya sa mga bata.
Sigun sa gwardya nga atol sa imbestigasyon sa Mambaling Police Station, si Belano napungot na sa maong mga bata hinungdan nga iya kining gipasalbahan gamit ang iyang 9mm service firearm.
“Ingun sa gwardya napuno na kuno siya. Pirmi daw kini mangawat og mga scrap metal unya batuon sad daw siya. Mao to iyang gipasalbahan pero naigo man sa liog,” matod ni Baldo.
Dali nga gidala si Ferrer sa Cebu City Medical Center (CCMC) apan gideklarar sa mga doktor nga dead on arrival.
Human sa insidente, nitahan dayon sa police station si Belano.
Siya mag-atubang og kasong homicide in relation to Republic Act (RA) 7610 kun Special Protection of Children Against Abuse, Exploitation and Discrimination Act ang ipasaka sa Mambaling police station batok kang Belano.
Si Belano naa sa Mambaling Police Station kasamtangang gibilanggo.