NAKATALA og 11 ka mga bag-ong kaso sa coronavirus disease (Covid-19) ang Cagayan de Oro, pulos mga local transmissions, sumala sa report sa City Health Office Sabado, Abril 24.
Ang kinatibuk-ang ihap sa mga kumpirmadong kaso sa Covid-19 sa dakbayan anaa na sa 4,604.
Matud sa City Health Office, sa 11 ka mga bag-ong lokal nga kaso, tulo ang mga lokal authorized persons outside residence (Apors), duha ang mga local index nga mga kaso, ug unom ang mga local case with link.
Sa 4,604 nga kinatibuk-ang kaso sa Covid-19 sa syudad, 435 ang mga returning overseas Filipino workers/locally stranded individuals (ROFs/LSIs) ug 4,169 ang mga local transmissions.
Ang Cagayan de Oro adunay 333 ka mga active cases, 113 niini na-admit sa Northern Mindanao Medical Center ug uban pang mga ospital sa syudad, 215 ang mga outpatients, ug lima ang mga ROFs/LSIs.
Nakatala usab og 29 ka mga Covid-positive nga mga kaso nga karon naka-recover. Anaa na karon sa 4,065 ang ihap sa mga nakarekober nga mga kaso sa dakbayan.
Sa maong numero, 307 ang mga LSIs, 122 ang mga ROFs, ug 3,636 ang mga lokal nga kaso (community: 3,085; Apors: 551).
Ang recovery rate sa Cagayan de Oro anaa na sa 88.29 percent.
Ang ihap sa mga namatay sa Covid-19 sa syudad naa sa 206.