MIPAKATAP og 28 puntos si Shane Menina, 25 niini sa second half, aron ituboy ang MJAS Zenith-Talisay City Aquastars ngadto sa 81-72 nga kadaugan batok sa KCS Computer Specialist-Mandaue City sa second round a Chooks-to-Go Pilipinas VisMin Super Cup niadtong Sabado sa gabii as Alcantara Civic Center sa lungsod sa Alcantara, Cebu.
Sa kadaugan, ang Talisay nisulbong ngadto sa 8-0 nga baraha ug daw naglawig na sa ilang pag-entra sa sunod nga round ning unang conference sa bag-ong natukod nga laing professional basketball league sa nasod.
Nagsugod ang kainit ni Menina sa dihang nabiyaan ang Talisay sa nahabiling 4:57 segundos sa third quarter, 40-47, pinaagi sa pagduslit og duha ka sunodsunod nga tres ug ang iyang assist ngadto ni Jaymar Gimpayan maoy naghatag kanila og labaw 50-47.
Gikan niini, gipakita na sa Aquastars ang ilang dominasyon ug ang 18-2 nga rally maoy nagwahing sa ilang dalan paingon sa kadaugan, 58-49.
Dihay higayon nga misuway pagpahagsa og rally ang Mandaue aron pahakan ang labaw ngadto sa singko puntos, 57-62, kortesiya sa tres ni Steve Castro.
Apan wa kini makapabugnaw sa kainit sas mga kamot ni Menina kinsa nakadawat usab og igong suporta gikan sa iyang mga kaubanan.
Gani miulbo pa ngadto sa 74-59 ang bintaha, 3:39 ang nahabilin sa duwa.
Gawas sa 28 puntos si Menina aduna usay duha ka rebounds, duha ka assists ug upat ka steals sulod sa 21 minutos.
Si Gempayan midugang o 19 puntos ug 12 ka rebounds.
Sa habig sa KCS Computer nga gipanag-iya ni Ricky Verdida, ang panagparis sa duha ka guard nga sila i Shaquille Imperial ug Gileant Delator maoy nangulo sa scoring nga may 18 ug 12 nga pasunod.
Sila naghupot sa ikaduhang puwesto nga may 5-2 nga baraha.
Mga puntos:
Talisay (81) — Menina 28, Gimpayan 19, Mojica 6, Villafranca 6, Hubalde 5, Eguilos 4, Casajeros 4, Acuña 3, Santos 2, Cabahug 2, Jamon 2, Mabigat 0, Cuyos 0, dela Cerna 0.
Mandaue (73) — Imperial 18, Delator 12, Octobre 9, Mendoza 8, Bongaciso 7, Mercader 5, Roncal 4, Solera 4, Castro 3, Cachuela 3, Soliva 0. Quarterscores: 17-17, 36-39, 58-49, 81-73