USA sa dakong isyu karong panahona mao kining bag-ong misulpot nga COMMUNITY PANTRY. Sa atong programa sa KONTRA BALANSE sa DXOW adunay nangutana pinaagi sa text message, kon unsa kunoy buot ipasabot sa community pantry.
Sa Webster’s New Dictionary ang pasabot sa pantry, "room for storing food or utensils", ang buot ipasabot lugar nga pundohanan og mga pagkaon para sa atong kusina.
Mao kini ang inyong nakita unang-una didto sa Quezon City nga naglaray ang mga daghang mga pagkaon para sa atong kusina.
Apan lahi kini sa mga pagkaon nga naglaray sa mga palengke nga human ka mamili, mobayad ka sa tag-iya sa mga pagkaon nga imong gusto.
Kini libre, apan limitado, kutob lang sa usa, o duha ka lung-agan aron matambalan ang kagutom ug kawad-on sa atong mga kaigsuonan niining panahon sa kalisud nga atong giatubang gumikan sa Covid-19 pandemic.
Gidayeg nato ang maong programa, tungod kay kini ang gitawag og "bayanihan", pagtinabangay niining panahon sa kagutom.
Ang buot ipasabot dinhi wala kita mag-inusara ning kalibutana, may mga kaigsuonan kita nga andam mogahin sa ilang mga salapi aron pakan-on kadtong mga gipanggutom. Dalayegon ang maong kalihukan.
Apan dinhi mangutana kita, kay wala may dautan sa pangutana. Wala ba kahay nagpaluyo niini? Kay niadtong adlaw'ng Huwebes, sa balita sa telebisyon, atong nakita, nga dili lang daw mga materyal nga pagkaon ang ilang ipanghatag, kon dili kaalaman o edukasyon. Human og panghatag sa mga pagkaon, nanghatag og mga leaflets ug sa likod niini anaa ang hulagway ni Presidente Rodrigo Duterte ug may tatak "OUST DUTERTE," KMU-Piston.
Kon dili kini iya sa kaaway sa atong gobyerno, kinahanglan bantayan sa nag-organisa niini nga dili sakyan sa kalihukang komunista sa Pilipinas, kay katingad-an kay wala ray usa ka semana, milukop gilayon sa tibuok Pilipinas.
Community Pantry of the Philipines (CPP), pareho ang inisyal sa Communist Party of the Philippines (CPP). Manghinaut kita nga dili ni masumpayan og National Pantry Authority (NPA) kay mabuo na nga CPP-NPA.
Hulaton nato og unsay dagan niining nindot nga kalihukan, kay motabang ka sa atong gobyerno dili ka mangatake. Apan sa tumoy unya nga bahin niining Community Pantry of the Philippines kun mangatake kini sa atong gobyerno, klaro na nga iya kini sa kaaway.
Sa pagkakaron, nia kita sa pagpaniid, kay nasayud man kitang tanan nga wala magpasagad ang gobyerno sa mga ayuda. Ato sad lingion kon unsay nahimo sa gobyerno sama sa paghatag og 4Ps sa kabus kaayong pamilya.
Social pension sa mga senior citizen nga dili pensioner sa SSS (Social Security System) ug GSIS (Government Service Insurance System) nga kaniadto P500 lang karon P1000 na kada bulan ug ihatag kini matag tulo ka bulan. Nia rabay batasan nato, nga hatagan gani ta karon ug duha ka kilo nga bugas, gulay, asin ug asukar, makalimot nata ug unsay gihatg sa gobyerno para sa ato? Kon ngano nga nagkulang tungod kay ato mang ipanugal.
Ang imong gidawat nga pipila ka kilong bugas, gulay, tinapa, asin, asukar ug uban pa diha sa Community Pantry temporary, pero ang mga benepisiyo nga gihatag sa gobyerno sa inyo permamente.