MIKALAS na og lima ka mga sakop sa Bangsamoro Islamic Freedom Fighters (BIFF) ang gikasa nga calibrated law enforcement operation sa militar nga nagsugod kaadlawon niadtong Sabado, Abril 24, sa utlanan sa mga probinsiya sa North Cotabato ug Maguindanao.
Mga nakalas giila nga sila si Salem Ansao, Mudin Ramla, alyas Saib, alyas Omar ug alyas Tato.
Gawas kanila, duna say siyam ka mga kauban niini ang naangol sa binakbakay kinsa giingong mga sakop sa Shiek Ismail Abdulmalik alyas Kumander Abu Toraife sa BIFF.
Sumala kang 6th Infantry (Kampilan) Division Spokesman Lieutenant Colonel John Paul Baldomar, nasiplatan ang grupo ni Kumander Abu Toraife sa utlanan sa Shariff Saydona Mustapha, Maguindanao Province ug Pikit, North Cotabato nga nagtapok-tapok sa plano nilang pagpangatake.
Gibombahan dayon sa Joint Task Force Central ang BIFF gamit ang 105mm Howitzers cannon.
Ang grupo ni Toraife miatras ug nanago karon sa mga hilit nga dapit sa Liguasan Delta ug SPMS box. (Edgar E. Fuerzas)