LUYO sa pipila ka negatibo nga opinyon sa uban labot community pantry kay kuno magamit sa pipila ka negusyante nga mobatok sa gobyerno, wala nagpatarog sa isyu ang kapulisan sa Davao City Police Office (DCPO) ug mihimo sab sila niini nga gitawag og "Pantry ng Pulis."
Niadtong Sabado, Abril 24, 2021, mapasigarbuhon si DCPO Director Colonel Kirby John Kraft nga malampuson ang pagtukod sa community pantry sa Davao City police.
Giplastar kini gawas sa Camp Domingo E. Leonor Headquarters (Barrack) San Pedro Street, Dakbayan sa Davao.
"This activity aims to intensify the spirit of giving and sharing during this time of pandemic," ingon sa DCPO.
Ang Talomo Police Station nga sakop sab sa DCPO mihimo sab sa ilang kaugalingon nga bersiyon sa community pantry sa ilang istasyon sa McArthur Highway, Brgy, 74-A, Matina Crossing ning siyudad.
Nagkadaiyang canned goods ug uban pang mga pagkaon ang anaa sa ilang pantry nga gigiyahan sa mga pulis aron mapatuman ang social distancing ugaling modagsa ang mga tawo.
Bisan sa mga negatibo nga istorya labot community pantry, usa lamang ang tumong ug katuyoan sa kapulisan ug bisan sa mga nagtukod niini sa Davao City, ang pagtabang sa nanginahanglan labi na niining panahon sa krisis nga dala sa pandemya. (Jeepy P. Compio)