USA ka retiradong sakop sa Philippine Navy (PN) gipusasan human makuhai sa iyang posisyon sa upat ka kinarnap nga mga motorsiklo alas 10:00 sa buntag sa Dominggo, Abril 25, sa Sitio Hagubhub, Barangay Panugnawan, lungsod sa Medellin.
Si Retired Staff Sgt. Raul Villacastin, 61, minyo ug nagpuyo sa nahisgutang lugar.
Usa ka Joeffer Lou Pino, 28, minyo, kawani sa food delivery company ug taga Villagonzalo, Brgy. Tejero, dakbayan sa Sugbo nangayog abag sa Medellin Police Station human ang iyang Yamaha Sniper nga mobalor sa P104 mil nasuta nga diha sa posisyon sa retiradong sakop sa PN.
Gipangita pa sa kapulisan ang nagkarnap nga si Romeo Niño Consad, hingkod ang panuigon ug taga Barangay Tejero.
Si Police Corporal Rosano Quedeng, sa Medellin Police Station nga nahinabi sa Superbalita Cebu, nagkanayon ang biktima uban sa usa ka Joccel Nudalo, 20, kinsa kanhi kapuyo ni Consad.
Matod ni Quedeng, dali nilang gisuhid ang panimalay sa retiradong Navy, didto nakita nila ang motorsiklo sa biktima.
Laing narekuber sa kapulisan ang tulo pa ka mga motorsiklo. Ang suspek nanghimakak nga may kalambigitan sa krimen.
Mirason kini nga igo lang siya mamalit sa mga secondhand nga motorsiklo.
“Gitago-an ni niya didto na sa likod sa iyang panimalay, gitabunag habol ang mga motorsiklo,” dugang ni Quedeng.
Wala isalikway sa kapulisan ang posibilidad nga ang dinakpan dunay kalambigitan sa mga kawat sa motorsiklo.
Duna nay mga report sa ilang dapit nga nawad-an sab og mga motorsiklo.
Giawhag nila ang mga nabiktima sa karnap sa motorsiklo nga mosusi sa ilang buhatan kay duna pay daghang wala marekuber.
Nagtuo ang kapulisan nga dugay na nga modus sa suspetsado nga kunuhay mamalitayg motorsiklo.
Sa pagkakaron kasong kalapasan sa Anti-Fencing Law ang ilang ipasaka batok sa suspetsado. (GPL)