NAHIMONG kontrobersiyal atol sa Covid-19 pandemic ang mga community pantry sa lain-laing mga lugar sa atong nasod, labi na kadtong ubos sa lockdown. Sa community pantry, kadtong adunay ikadonar, mahimong modonar og mga pagkaon. Libre ang tanan alang sa nanginahanglan.
Apan ang nagpasiugda sa mga community pantry gipasanginlan na hinuon sa usa ka opisyal sa militar nga komunista.
Kon ang gobyerno wa na manghatag og ayuda unya dunay nanghatag og ayuda, komunista na diay ang naghatag og ayuda?
Kanus-a nahimong komunista ang mga dato nga mopaambit sa ilang grasya ngadto sa mga kabus ug alaot sa kinabuhi? Angay natong masayran nga ubos sa komunismo, way free will. Way manghatag kay way ikahatag kay ang tanan imbarguhon sa gobyerno.
Apan wa magpalupig ang kagamhanan sa siyudad sa Sugbo bahin sa community pantry. Buksan sa siyudad karong adlawa, Lunes, Abril 26, 2021, ang community pantry sa siyudad diha sa Plaza Sugbo.
Si Cebu City Mayor Edgardo Labella niingon nga padayong nangandam ang Market Operations Division (MOD) aron mahiusa ang tanan nga mga produktong ipanghatag nga libre niadtong mga nanginahanglan.
Ang mohatag mao ang mga manindahay sa Carbon Market nga andam mohatag sa ilang mga baligyang utanon, lamas ug prutas. Gusto sab nila nga apilan og grocery items sama sa linata ug noodles.
Karon nga gobyerno sa siyudad na ang magpasiugda, di na makaingon ang militar nga kini gipasiugdahan sa mga komunista. Ang ato lang nga gikabalak-an kon molahutay ba kining community pantry sa siyudad sa Sugbo.
Donar kutob sa imong maabot. Kuha sigun sa imong panginahanglan. Morag komunista kon paminawon.
Tungod niini ang nag-una sa community pantry, si Ana Patricia Non, founder sa Maginhawa Community Pantry sa Maginhawa St., Quezon City, niundang kay nahadlok siya sa hulga sa kinabuhi sa volunteers.