KAY naghinapos na sab ang bulan sa Abril, dumdumon sa mga mamalitay og bulad ang kasikas sa Tabo-an Public Market matag tuig. Ang nabaniog na kaayo nga Bulad Festival pahinungod sa ilang patron saint nga si Señor Santo Niño. Taudtaod na ni nga kalihukan nga gipasiugdahan sa subra sa usa ka gatos ka mga manindahay og bulad sa maong merkado. Di ikalimod nga ang Tabo-an Public Market, gikan pa kaniadto hangtod karon, nahimo na nga tinubdan sa nagkadaiyang klase sa lamian nga bulad.
Anhi dinhi mag-abot ang klase klasing bulad nga maggikan sa isla sa Bantayan, Kawit sa lungsod sa Medellin, San Roque, Talisay City, Duljo, Bohol, Zamboanga ug Jolo. Kon mangita ka og bulad, merkado sa Tabo-an maoy daling mahinumduman gikan kaniadto hangtod karon. Sa ato pa, ang mga bulad nga gibaligya sa mga merkado dinhi sa Sugbo ang tinubdan mao ang merkado sa Tabo-an. Gumikan niini, pipila ka tuig ang nakalabay ang mga manindahay og bulad didto nagkasabot nga palambuon ang maong matang sa negosyo ug palig-unon ang ilang presensiya pinaagi sa pagpasiugda og Bulad Festival.
Gawas sa novena, Sinulog, salosalo ug labaw sa tanan ang paghatag og dagkong diskwento ngadto sa mga pumapalit. Ang maong kalihukan giatngan matag tuig. Gibaha sa daghang pumapalit ug nilampos silang tanan pag-ambit og luna sa kasaysayan nga pinaagi sa Bulad Festival, masayran sa tanan ang dako nilang tampo sa ekonomiya ug turismo ning bahina sa Sugbo. Way mga bisita ang Sugbo nga di maghisgut og bulad nga nukos, danggit, bolinaw, ug daghan pa nga gihimong sinugatan sa ilang pagpauli.
Kon sikat ang litsong baboy sa Cebu, ingon ana sab ka inila ang bulad sa ato sa nagkadaiyang dapit sa Pilipinas ug sa gawas sa nasod. Pangutan-a ang inyong mga paryente sa America, Canada, Europe, Australia, New Zealand, Hong Kong, Singapore, China ug bisan asa dinhi sa Asya, kon may namaligya ba didto sa mga paboritong klase sa bulad sa Tabo-an. Ang ilang tubag dakong Yes.
Tungod kana sa kalami nga way sama. Bisan ang mga hotel sa Metro Manila, Luzon, Boracay, Palawan, Cebu, Negros, Leyte, Samar ug Mindanao dili mawad-an og bulad gikan sa Sugbo kay ang ilang guest mangita niana labi na sa oras sa tingpamahaw. Mao na ang tinuod ug ingon niana ta ka inila sa bisan asang suok sa kalibutan. Dayag nalang nga ang Bulad Festival angay gyud ipadayon. Apan kon unsa man ka mabulokon ug masidlakon ang Bulad Festival kaniadto, kalit lang nga napawong human nga si Covid-19 nanghasi niadtong 2020.
Way selebrasyon nga napahigayon. Sa uwahi nakong pagduaw sa buwaran sa Taboan niadtong Sabado, Abril 24, gisultian ko ni Anita Batindol, usa sa mga organizer, nga padayon pa ang sabotsabot kon unsa nga matang sa kalihukan nga mahimong pasiugdahan subay sa mga protocol nga gipatuman. Naa ra gihapon ang Bulad Festival. Galing lang, dili na mapahigayon ang ubang kalihukan kaniadto.