KIDAPAWAN CITY -- Gisubay pa sa kapulisan ang pagpusil patay sa usa ka senior citizen alas 7:30 sa gabii, Dominggo, Abril 25, sa M'lang, North Cotabato.
Giila ang biktima nga si Teresita Camsa, 63, minyo, buy and sell trader ug molupyo sa Barangay Tibao sa maong lungsod.
Gibutyag ni M'lang Chief of Police Lieutenant Colonel Realan Mamon nga naglingkod lang ang biktima atubangan sa iyang tindahan apan kalit lang giduol sa duha ka wala milhing suspek ug gipusil tumong sa dughan ug ulo.
Patay gilayon ang biktima samtang ang mga suspek misibat sakay sa motorsiklo paingon sa direksiyon sa Maguindanao Province.
Selos sa negusyo ang usa sa mga gisuta karon sa kapulisan nga posibleng motibo sa pagpatay kaniya. (Edgar E. Fuerzas)