INGON ug alang sa pagsunod sa gipagula nga Executive Order (EO) 22 ni Davao City Mayor Sara Duterte-Carpio, mipailawon sa swab testing ang mga drayber sa public utility vehicles (PUVs).
Sugod kagahapon sa buntag, Abril 26, mga PUV drivers nangadto sa Davao Crocodile Park aron mopailawom sa libreng swab testing isip kabahin sa Covid-19 surveillance sa dakbayan.
Kahinumdoman nga sa nakalabay nga semana, si Duterte-Carpio miisyu og EO 22, "An Order Providing For Heightened Surveillance and Response of Covid-19 Cases in Public Ground Transport and Delivery Service in Davao City," isip pagpakusog sa pagbantay batok Covid-19 ug maseguro nga luwas sa virus ang mga PUV drivers.
Subay sa Section 1 sa EO, ang siyudad motanyag sa libre nga Covid-19 swab testing sa tanang drayber sa delivery service sama sa taxi drivers, van drivers, airconditioned and non-airconditioned jeepney drivers, habal-habal o motorcycle drivers, tricycle drivers, bus drivers, ubang drivers sa public ground transport vehicles, ug motorcycle drivers sa food ug online item delivery services sama sa Grab, Foodpanda, Shopee, Lazada, ug daghan pa.
Ang libre nga testing gisugdan kagahapong adlawa, hangtud Mayo 8, 2021, gikan Lunes ngadto Sabado, 8:30-11:30 sa buntag didto sa Davao Crocodile Park. (Jeepy P. Compio)