GIBUTYAG ni Davao City Mayor Sara Duterte kagahapon, Lunes, Abril 26, nga miapela ang lokal nga panggamhanan ngadto sa Regional Inter-Agency Task Force (RIATF) Against Covid-19 aron nga ang tibuok Davao Region ipailawom ubos sa "semi-closed border."
Gisulti ni Duterte-Carpio sa paghinabi kaniya sa radyo nga kini maoy unod sa pormal nga suwat sa lokal nga panggamhanan nga gipadala ngadto sa RIATF, nga miapela nga aprobahan ang mas istrikto nga "screening measures" alang sa mga mobiyahe nga moagi sa mga checkpoints sa rehiyon sayo ning bulana.
Matud niya nga nakadawat na sila og "feedback" gikan sa Department of the Interior and Local Government (DILG), ang "lead chair" nga ahensiya sa RIATF.
Gisaysay sa mayor nga gipangayoan na og komentaryo sa RIATF ang mga ehekutibo sa nagkadaiyang mga LGUs sa rehiyon bahin sa sugyot sa siyudad.
Gitug-an sa mayor nga wala na niya gikonsulta ang mga mayor sa mga local government units (LGUs) sa rehiyon, inay, midirekta na siya sa iyang sugyot ngadto sa RIATF.
"We wrote to the RIATF about [semi-]closing Davao Region [sa] mga travelers gikan sa gawas sa (mga biyahero gikan sa gawas) Davao Region. Ang atoang RIATF nagpa-comment na sila sa mga local chief executive about this plan," butyag ni Duterte-Carpio sa paghinabi kaniya sa 87.5 FM Davao City Disaster Radio.
"Hopefully, something will come out of it na ma-semi sirado ang atoang region except for those essential travelers, and then kita diri, sa region, we work on our existing around 800 cases," dugang sa mayor.
Puno pa sa mayor nga ang apela subay sa rekomendasyon sa Department of Health (DOH)-Davao aron pag-imposar og mas hugot nga "screening measures" sa utlanang mga checkpoints sud sa rehiyon.
Gisulti sa mayor nga ang rehiyon kinahanglan maningkamot nga maputol ang transmisyon sa kagaw pinaagi sa "fast-track isolation," ug "contact tracing."
Giesplikar sa mayor nga plano na kini sa siyudad niadto pang niaging tuig. Apan giangkon niini nga usa kini ka suliran gumikan ang dakbayan mao ang sentro sa komersiyo.
Hinuon, ang "region wide semi-border closure" mas haum itandi kon "Davao City-wide."
Naglaum ang mayor nga tugtan ang ilang apela.