Alegres milangoy libot sa isla sa Mactan sulod sa 17 ka oras

MILAMPOS SA PAGLANGOY: Ang swimmer nga si Cleevan Alegres (tunga) human sa iyang malampusong paglangoy libot isla sa Mactan sulod sa 17 ka oras ug 37 minutos niadtong Dominggo, Abril 25. Gipasidunggan ni Mayor Junard Chan (wala). Uban sa hulagway mao ang Oponganon nga modala sa papel ni Lapulapu sa re-enactment karon, Abril 27. / Alan Tangcawan
MILAMPOS SA PAGLANGOY: Ang swimmer nga si Cleevan Alegres (tunga) human sa iyang malampusong paglangoy libot isla sa Mactan sulod sa 17 ka oras ug 37 minutos niadtong Dominggo, Abril 25. Gipasidunggan ni Mayor Junard Chan (wala). Uban sa hulagway mao ang Oponganon nga modala sa papel ni Lapulapu sa re-enactment karon, Abril 27. / Alan Tangcawan

Malampusong gilibot og gilangoy sa Oponganong open swimmer nga si Cleevan Alegres ang isla sa Mactan sulod sa 17 ka oras ug 37 minutos.

Nigikan si Alegres sa may Liberty Shrine sa Brgy. Mactan niadtong Dominggo, Abril 25, sa alas 5 sa hapon ug nabalik sa lugar kagahapon Abril 26 sa alas 10:37 sa buntag. (Laing istorya sa Sports, pahina 16.)

Ang gilangoy ni Alegres moabot sa 44 kilometros.

Target unta nga humanon ni Alegres ang gilay-on sud sa 20 ka oras apan gumikan kay nakakuha og paborableng panahon ug sulog sa dagat hayan iya kining nakuha sa mas ubos nga oras.

Siya maoy labing una nga Oponganon nga milibot sa isla sa Mactan pinaagi sa paglangoy nga maoy nagsilbi usab nga pahinungod ni Alegres sa ika-500 ka tuig nga kasumaran sa Kadaugan sa Mactan karong adlawa Abril 27.

Usa usab kini sa iyang pamaagi pagpadangat sa mensahe ngadto sa katawhan sa pagprotehir sa kalikupan.

Matod ni Alegres nga ang hunasan ra sa lungsod sa Cordova ang naghatag niya ug kalisod diin nasamad siya sa mga tuyom ug sisi.

“Niana ra gyud ko sa ako kaugalingon nga mahuman ra gyud ni mahuman ra gyud ni nahiwa ni akoa kamot tungod sa kahunas. Kaon ra ko og duha ka Snickers ug usa ka Powerbar,” matod ni Alegres.

Gumikan sa iyang nabuhat nakadawat si Alegres og P42,000 gikan sa Mactan Electric Company (Meco) isip pahalipay sa iyang nabuhat.

Samtang ang kagamhanan sa Lapu-Lapu gikatakdang mopasar og resolusyon paghatag kaniya ug pahalipay usab nga P100,000, sumala ni Lapu-Lapu City Mayor Junard Chan nga mainitong nisugat kang Alegres uban ang mga kabanay niini.

“Dako kaayong history ang nahitabo karong adlawa. Garbo ug dungog namo kaming mga Oponganon, kaming mga anak ug apo ni Lapulapu, nga aduna gyud mi dugo ni Lapu-Lapu nga taga Barangay Maribago nga nagmalampuson siya nga ni circumnavigate sa island of Mactan. This is already a history of the Oponganon,” matod ni Chan.

Plano ni Alegres nga sunod molangoy sa kadagatan sa Dakbayan sa Sugbo. (GCM)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph