Nanawagan si Cebu Provincial Police Office (CPPO) Director Police Colonel Engelbert Soriano nga dili abusaran ang bag-ong lakang sa kagamhanan sa Lalawigan sa Sugbo ug sa kapulisan nga dili na dakpon ang masakpan nga wala mag-mask.
Kini maoy panahom ni Soriano subay sa pormal nga pag-turn over na sa 3 milyones ka mga masks sa mga hepe sa kapulisan sa probinsya sa Abril 26, 2021.
“Ang warning ko lang diyan huwag naman mag abuso, binigyan na nga namin sila ng masks tapos nakita mo the next day wala na namang mask. So that would call for the sound discretion of the concerned chief of police kung paano niya i-exercise ang authority niya... Kung binigyan mo ng mask bukas pag makita mo, bigyan mo ulit, pero kung pang apat wala ulit that is already deliberately endangering the lives of other people so medyo parang ibang usapan na din iyon,” matod ni Soriano sa Abril 26.
Niluwat og memorandum si Cebu Governor Gwendolyn Garcia pagpapas sa kamandoan labot sa pagmulta kon masakpan nga wala mag sul-ob og mask.
Atol sa pag pamulong ni Garcia, gibutyag niini nga pipila ka mga lokal nga kagamhanan, ang nagpamulta sa mga Sugboanon og moabot P500 kon masakpan kini nga dili mag sul-ob og mask.
Una na usab giklaro sa gobernador nga likayan ang pagpanagmal o ang pagmaltrato sa mga wala mag sul-ob og mask.
“...Dunay lain nigawas naa ba to’y gipalit tubig ba to wa nag mask gipa push up, patay kay tingali weak ang kasingkasing. Dili ta buot nga mahitabo na dinhi sa probinsya sa Sugbo, not on my watch. Because the worst thing you chiefs of police can do is to abuse the poor. Di na nila kaya mobarog para sa ilang katungdanan, wa mani silay tingog, wa mani silay kasandigan so let us be the epitomy of fairness and justice,” matod ni Garcia. (ANV)