Adunay gamay nga kausaban sa traffic palibot ug duol sa Liberty Shrine sa Brgy. Mactan karong adlawa, Abril 27, matod ni Mario Napule, pangulo sa Lapu-Lapu City Traffic Management System (CTMS).
Kini subay sa pagsaulog sa ika-500 ka tuig nga kasumaran sa Kadaugan sa Mactan.
Matod ni Napule nga ang tanang motorista nga mopaingon sa Punta Engaño gikan sa Ibo ug uban pang dapit sa dakbayan mo-right turn sa eskina Maribago ug Mactan inay molahos sa naandang rota.
Mo-left turn sila sa may Mactan Newtown ug diritso na sa Punta Engaño.
Samtang ang gikan sa Punta Engaño paingon sa Brgy. Ibo ug uban pa nilang destinasyon ari usab agi sa Mactan Newtown ug dili makaagi palibot sa Liberty Shrine.
Magsugod ang maong traffic scheme sa alas sa 6 sa buntag hangtod nga mahuman ang mga kalihukan sa Shrine nga posibleng molanat pa hangtod gabie depende sa sitwasyon, sumala ni Napule.
Giawhag ni Napule ang mga motorista nga kung mahimo likayan lang una ang palibot sa Liberty Shrine aron usab dili sila makasinati og gamayng kakulian sa ilang pagbiyahe.
Gawas sa karsada palibot sa Liberty Shrine wala ray laing karsada sa dakbayan nga masirad-an gumikan sa mga kalihukan sa ika-500 ka tuig nga Kadaugan sa Mactan.
“Kani nuong sa Mactan Newtown nga karsada dako ni two way gyud ni. Ato lang gisayo ug sirado ang karsada kay daghan raba mga bisita nga mga VIP,” matod ni Napule. (GCM)