Gipusasan ang duha ka municipal councilors human naaktuhan nga nagpasiugda sa tigbakayan sa alas 12:10 sa kaadlawon niadtong Lunes, Abril 26, sa Gallera de Laganason, Barangay Esperanza, lungsod sa Poro sa isla sa Camotes.
Ang kapulisan misignit sa 55 ka sugarol lakip sa duha ka municipal councilors nga mao sila si Andrew Zurita, 38, ug Ashley Otadoy, 54, ug ang Department of Interior and Local Government (DILG) municipal officer nga si Cliff Otadoy.
Ang buwangan gipanag-iya ni kanhi municipal councilor Augustus Zurita, 44, kinsa nasikop sab.
Gikondinar sa mga kadagkoan sa kagamhanan sa lungsod sa Poro ang pagkasikop sa tulo ka mga opisyal sa lungsod ug usa ka empleyado sa national government agency human ilegal nga nag tari sa Gallera de Lagnasan sa Barangay Esperanza.
Si Poro Vice Mayor Luciano Rama nagkanayon nga kinahanhlang atubangon sa mga opisyal ang sayop niini og ipatuman kon unsa ang anaa sa balaod.
“The full force of the law should be implemented. They should not abuse their capacity as elected officials,” matod ni Rama sa Abril 26.
Samtang si Mayor Edgar Rama mibutyag usab nga gitugot na sa lungsod ang tigbakay apan kadto lang mga lisensyado. Apan ang naasoyng kalihukan sa kadlawon, wala’y permit.
“Kadto nga tigbakay pag kadlawon was not granted with any permit, as far as I can remember,” matod ni Rama.
Sa pasiunang taho sa Provincial Intelligence Unit (PIU) ug 1st Provincial Mobile Force Company (PMFC), moabot 55 ka mga indibidwal ang giingong nisalmot sa ilegal nga kalihukan sa lungsod.
Sa pakisusi, nasikop mao sila si Konsehal Ashley Otadoy, 54; Andrew Zurita, 38; ug Konsehal sa Barangay Mercedes nga si Dennis Camomot, 48.
Atol sa pakighinabi sa mga tigbalita, gipahibaw ni Police Colonel Engelbert Soriano, direktor sa Cebu Provincial Police Office (CPPO) nga kasamtangang natanggong sa Poro Municipal Station ang mga nadakpan.
Dugang ni Soriano nga ang operasyon nahitabo subay sa sumbong usab sa mga residente sa lungsod.
“It doesn’t matter who’s there actually marami na rin na mga barangay kagawad sabi ko kanina na law enforcement without fear or favor...traditionally ang tigbakay kasi parang part na sa buhay ng Pilipino iyan but unfortunately we have a law prohibiting tigbakay,” matod ni Soriano sa Abril 26.
Subay sa bag-ong guidelines sa Inter Agency Task Force (IATF) gitugotan na pag-operate ang lisensyadong sabong sa mga lugar nga gipaubos sa modified general community quarantine (MGCQ) apan kinahanglan gihapon nga mosubay sa mga lagda aron nalikay sa pagtakod sa coronavirus disease.
Si Police Lt. Jeorge Francis Rodrin, Hepe sa Provincial Intelligence Unit’s (PIU-CPPO) uban sa 1st PMFC-CPPO ug Poro Police Station maoy nakasikop sa mga sugarol.
Si Lt. Christopher Toregosa, hepe sa Poro Police Station nga nahinabi sa Superbalita Cebu, nagkanayon nga makadaghan na nila nga gibadlong ang maong kalihukan.
Daghang report ang ilang madawat inig respondi nila kalit lang nga mamingaw.
Pero wala sila magkuwang sa pahimangno, duna sab silay nangadakpan sa ubang area
Napuno ang holding area sa Poro Police Station tungod sa dili mominos 55 ka mga tawo ang nadakpan samtang, ang ubang nakaipsot sa pagronda sa kapulisan. (GPL, ANV)